AMEA N.Tusi adına Şamaxı Astrofizika Rəsədxanasının Elmi Şurasının növbəti iclası keçirilib.

Rəsədxananın 2017-ci ildəki elmi və elmi-təşkilati fəaliyyətinin yekunlarına həsr olunmuş hesabat xarakterli tədbirdə Elmi Şuranın üzvləri və şöbə əməkdaşları iştirak edib.

Tədbiri giriş sözü ilə açan Şamaxı Astrofizika Rəsədxanasının elmi işlər üzrə direktor müavini, fizika-riyaziyyat üzrə fəlsəfə doktoru Elçin Babayev iclas haqqında ümumi məlumat verib.

Sonra Şamaxı Astrofizika Rəsədxanasının direktoru, AMEA-nın müxbir üzvü Namiq Cəlilov çıxış edərək il ərzində görülən elmi və elmi təşkilati işlər barədə məlumat verib.

Direktor bildirib ki, hesabat ilində elmi müəssisənin əməkdaşları tərəfindən 66 məqalə (onlardan 35-i xaricdə), 2 monoqrafiya çap olunub. Əməkdaşların impakt faktorlu jurnallarda 13 məqaləsi dərc edilib, onların əsərlərinə 86 istinad olunub.

N.Cəlilov vurğulayıb ki, hesabat ilində “Azərbaycan Astronomiya Jurnalı” beynəlxalq standartlara uyğunlaşdırılıb, yeni dizaynda və ingilis dilində (AAJ,Vol.11,№1,№2,№3,) çap olunaraq beynəlxalq astronomiya mərkəzlərinə və digər elmi müəssisələrə göndərilib.

Hesabat dövründə ŞAR-ın əməkdaşları 30-dan çox xarici ölkə ilə elmi əməkdaşlıq edib, 22 beynəlxalq elmi konfransın iştirakçısı olub. İl ərzində Rəsədxanada bir neçə nüfuzlu elmi təşkilatın  iştirakı ilə elmi tədbirlər keçirilib.

Hesabat ilində başlanılmış elmi-tədqiqat işlərinin əhəmiyyətini vurğulayan Namiq Cəlilov, bu istiqamətdə görülən işlərin növbəti ildə də davam etdirilməsindən danışıb.

Tədbirin sonunda Namiq Cəlilov hesabatla bağlı sualları cavablandırıb.

© Bütün hüquqlar qorunur. Xəbərlərdən istifadə edərkən www.shao.az saytına istinad zəruridir.