4-5 oktyabr 2021-ci il tarixlərində AMEA N.Tusi adına Şamaxı Astrofizika Rəsədxanasında (ŞAR) "Günəş sistemi cisimlərinin fizika və dinamikasının tədqiqində müasir istiqamətlər" adlı Beynəlxalq elmi konfrans keçiriləcək.
Bu il Azərbaycan elmi ictimaiyyəti Şamaxı Astrofizika Rəsədxanasının (ŞAR) ilk direktoru məşhur astronom Sultanov Hacıbəy Fərəculla oğlunun anadan olmasının 100 illiyini qeyd edir. O, 1921-ci ildə anadan olmuş, Azərbaycan Dövlət Universitetini bitirdikdən sonra Sovet ordusu sıralarında xidmət etmişdir. Böyük Vətən müharibəsi iştirakçısı olmuş, Hitler Almaniyasına qarşı vuruşmuşdur. H.Sultanov 1953-cü ildən Azərbaycanda astronomik rəsədxananın tikintisinə rəhbərlik etmiş, ŞAR-ın rəsmi yaradıldığı vaxtdan (1959-cu il) 1981-ci ilədək rəsədxananın direktoru olmuşdur. O, 1976-1981-illər ərzində Azərbaycan Milli Elmlər Akademiyasının vitse-prezidenti olmuş, 1981-2007-ci illər ərzində ŞAR-da "Kiçik cisimlərin tədqiqi" şöbəsinə rəhbərlik etmişdir. H.F. Sultanov Azərbaycan EA-nın həqiqi və Beynəlxalq Astronomiya İttifaqının üzvü olmuşdur. O, Sovet İttifaqının və Azərbaycan Respublikasının bir sıra dövlət mükafatları ilə təltif olunmuşdur. Onun elmi fəaliyyəti əsasən asteroidlərin yaranması probleminə həsr edilmişdir.
Azərbaycanın Milli Elmlər Akademiyası Rəyasət Heyətinin və ŞAR Elmi Şurasının qərarı ilə 2021-ci ilin 04-05 oktyabr tarixlərində Şamaxı Astrofizika Rəsədxanasında Akademik H.F.Sultanovun 100 illiyinə həsr olunmuş “Günəş sistemi cisimlərinin fizikası və dinamikası” adı altında Beynəlxalq onlayn konfransı keçiriləcəkdir.
Konfransın Təşkilat Komitəsi astronomları konfransda iştirak etməyə dəvət edir. Çıxışların adını və xülasələri Təşkilat Komitəsinin (lara_golubeva@mail.ru) elektron poçt ünvanına göndərə bilərsiniz.
Konfransın dili:
Azərbaycan, rus və ingilis dili
Materialların son göndərilmə tarixi:
15 Sentyabr 2021
Materialların nəşri:
Konfrans materiallarının (abstrakt və məqalələrin) Azərbaycan Astronomiya Jurnalında nəşri gözlənilir.
Məruzələrin məqalə forması http://aaj.shao.az/ saytında Sample başlığı altında göstərilən nümunəyə uyğun şəkildə təqdim edilməlidir.
Konfransın təşkilat komitəsinin ünvanı:
AZ-5626, Y.Məmmədəliyev qəsəbəsi, Şamaxı, Azərbaycan
E-mail: lara_golubeva@mail.ru
Telefon: (+994 20) 266 10 02, mob: (+994 50) 623 06 31 (WhatsApp)
© Bütün hüquqlar qorunur. Xəbərlərdən istifadə edərkən www.shao.az saytına istinad zəruridir.
