Oktyabrın 18-də AMEA Şamaxı Astrofizika Rəsədxanasının Bakı bölməsində "HD199478 ifratnəhəng ulduzunun spektrində hidrogen xətlərinin tədqiqi" mövzusunda astroseminar keçirilib.
Tədbiri giriş sözü ilə açan Şamaxı Astrofizika Rəsədxanasının elmi işlər üzrə direktor müavini, fizika-riyaziyyat üzrə fəlsəfə doktoru Elçin Babayev dövlət müstəqilliyinin bərpasının 26-cı ildönümü münasibətilə seminar iştirakçılarını təbrik edib. Alim bu tarixi gündə xalqımızın xilaskarı ümummilli lider Heydər Əliyevin əziz xatirəsinə dərin ehtiram bildirərək Ulu öndərə, Azərbaycanın dövlət müstəqilliyi və ərazi bütövlüyü uğrunda mübarizədə canlarını qurban verən şəhidlərimizə Allahdan rəhmət diləyib.
Sonra rəsədxananın “Qalaktikalar və ulduzəmələgəlmə prosesləri” şöbəsinin müdiri, fizika-riyaziyyat üzrə elmlər doktoru, professor Nəriman İsmayılov "HD199478 ifratnəhəng ulduzunun spektrində hidrogen xətlərinin tədqiqi" (Ş.K.İsmayılova, N.Z.İsmayılov, X.M.Mikayılov) mövzusunda məruzə ilə çıxış edib. Alim qeyd edib ki, HD199478 ifratnəhəng ulduzunda müşahidə olunan, fiziki təbiəti hələ məlum olmayan qeyri-adi geniş şüalanma və yüksək sürətli absorbsiya fenomeninin olması monitorinq edilib: “Müşahidələr göstərib ki, baxılan xətlərin parametrləri 18-24 gün ərzində dəyişməz qalır. Hidrogen xətlərinin parametrlərinin ən ehtimallı xarakterik dəyişmə vaxtı 22±2 gün təşkil edib”.
Məruzəçi vurğulayıb ki, yalnız 2011-ci ildə bir sezonda -510 km/s sürüşməyə malik olan geniş absorbsiya aşkar edilib. Hα xəttində göy qanadda müşahidə olunan geniş absorbsiyadan fərqli olaraq daha çox müşahidə olunan geniş şüalanma strukturunun sürəti ±500 km/s çatır.
Məruzə tədbir iştirakçıları tərəfindən maraqla qarşılanıb, mövzu ətrafında müzakirələr aparılıb, suallar cavablandırılıb.
© Bütün hüquqlar qorunur. Xəbərlərdən istifadə edərkən www.shao.az saytına istinad zəruridir.
