14 iyun 2021-ci il tarixində müxtəlif xəbər saytlarında rəsədxana əməkdaşı f.r.ü.f.d., dosent Ədalət Ətayi haqqında “AMEA-nın vəzifəli şəxsi barədə cinayət işi başlanıb” başlığı altında həqiqəti əks etdirməyən məlumat yayılıb. Bu isə Kütləvi İnformasiya Vasitələri (KİV) haqqında Azərbaycan Respublikası Qanununun kobud şəkildə pozulması halıdır. Belə ki, “Kütləvi İnformasiya Vasitələri haqqında” qanunun 10-cu maddəsinə əsasən yalan və qərəzli, eləcə də sensasiya naminə reallığı əks etdirməyən məlumatların yayılması məqsədilə kütləvi informasiya vasitələrindən istifadə olunması yolverilməzdir.

İctimaiyyətin nəzərinə çatdırırıq ki, əməkdaşımız haqqında KİV-də yayılan məlumatlar reallığı əks etdirmir. Məsələnin təfərrüatları ilə əlaqədar bütün məlumatlar və rəsmi məhkəmə qətnamələrinin surətləri Rəsədxananın rəsmi veb-səhifəsində yerləşdirilib (Arayış).

Qeyd edək ki, Azərbaycan Milli Elmlər Akademiyasının N.Tusi adına Şamaxı Astrofizika Rəsədxanası (ŞAR) kosmik plazma və heliogeofiziki problemlər istiqamətində aparılan nəzəri tədqiqatlar, həmçinin praktik astrofizikanın müasir tələblərinə cavab verən cihaz və qurğularda alınmış müşahidə materialları əsasında ulduz, planet və qalaktikaların prioritet istiqamətləri üzrə araşdırma işlərinin yerinə yetirildiyi elmi müəssisədir.  Daim öz elmi uğurları ilə fərqlənən Şamaxı Astrofizika Rəsədxanası və rəsədxana əməkdaşları haqqında xəbərləri dərc etməzdən öncə qurumla əlaqə saxlayıb məlumatın səhihliyini dəqiqləşdirmədən ictimailəşdirmək ən sadə təbirlə qeyd etsək qeyri-peşəkarlıq, rəsmi formada isə hüquqi məsuliyyətə cəlb olunmaq üçün əsasdır.

Hörmətli mətbuat nümayəndələrini bir daha jurnalist etikası qaydalarına riayət etməyə, uydurma məlumatları yaymamağa və ucuz sensasiya ilə gündəmə gəlməməyə çağırırıq.

© Bütün hüquqlar qorunur. Xəbərlərdən istifadə edərkən www.shao.az saytına istinad zəruridir.