02-06 oktyabr 2023-cü il tarixlərində Bakıda keçirilən 74-cü Beynəlxalq Astronavtika Kongresi öz işini uğurla başa vurub. Müxtəlif ölkələrdən 4000-dən çox iştirakçının qoşulduğu tədbirdə Nəsirəddin Tusi adına Şamaxı Astrofizika Rəsədxanası (ŞAR) alimləri də iştirak edib və konqresdə 2 elmi məruzə ilə təmsil olunublar. Məruzələrdən biri texniki (f.r.ü.f.d., dosent F.İsmayılov, f.r.e.d, müxbir üzv N.Cəlilov), digəri isə (f.r.e.d., prof. N.İsmayılov və b.) elmi sessiyada dinlənilib.
“Qlobal çağırışlar və imkanlar: kosmosa şans verək” mövzusunda keçirilən beynəlxalq konqresdə tədbir iştirakçıları ilə qlobal tendensiyalar, astronomiya sahəsində tərəfdaşlıq və əməkdaşlıq yolları müzakirə edilib. Belə ki, Qazaxıstanın Alma-Ata Dövlət Universitetindən olan alimlər Rəsədxana ilə birgə elmi tədqiqatların aparılması təşəbbüsü ilə ŞAR-ın şəhər bölməsində qonaq olub. Burada təşkil olunmuş elmi seminarda fizika və astronomiya üzrə fəlsəfə doktoru Gülnur Subebekova çıxış edərək astronomik materialların yeni üsulla emalı barədə məlumat verib. Maraqla qarşılanan çıxışın yekununda birgə əməkdaşlığın aspektləri müzakirə olunub.
Bundan başqa rəsədxana ilə əməkdaşlıqda maraqlı olan konfrans iştirakçılarının Şamaxı Astrofizika Rəsədxanasına (Pirqulu) səfəri təşkil olunub. Səfər zamanı Qazaxıstanın Fesenkov adına Astronomiya institutunun direktoru Çingiz Ömərovun rəhbərliyi ilə qazaxıstanlı astronomlar, o cümlədən Polşadan astronomik cihazlar üzrə çalışan Yaroslav Malinovski rəsədxananın infrasturukturu ilə tanış edilib. Qonaqlara ŞAR-da aparılan elmi tədqiqat işləri, beynəlxalq qrantlar çərçivəsində görülən işlər haqqında geniş məlumat verilib və Astrofizika və Kosmologiyanın qarşılıqlı maraq doğuran sahələləri üzrə əməkdaşlıq məsələləri müzakirə edilib.
Səmərəli keçən səfərin yekununda Fesenkov adına Astronomiya institutu ilə Şamaxı Astrofizika Rəsədxanası arasında əməkdaşlığın rəsmiləşdirilməsi, əməkdaşlıq çərçivəsində təcrübə mübadiləsinin həyata keçirilməsi üçün qarşılıqlı elmi ezamiyyətlərin təşkili və birgə elmi tədqiqatların aparılması üzrə ilkin razılıq əldə edilib. Həmçinin Türkdilli Dövlətlərin birgə Astronomiya Cəmiyyətinin təsis edilməsi ilə bağlı danışıqlar aparılıb və bu istiqamətdə birgə işlərə başlanması nəzərdə tutulur.
© Bütün hüquqlar qorunur. Xəbərlərdən istifadə edərkən www.shao.az saytına istinad zəruridir.
