Yanvarın 24-də AMEA N.Tusi adına Şamaxı Astrofizika Rəsədxanasının Bakı bölməsində növbəti astroseminar keçirilib.

Tədbiri giriş sözü ilə açan Şamaxı Astrofizika Rəsədxanasının direktoru, AMEA-nın müxbir üzvü Namiq Cəlilov seminar haqqında məlumat verib.

Sonra rəsədxananın “Qalaktikalar və ulduzəmələgəlmə prosesləri”şöbəsinin kiçik elmi işçisi Səbahəddin Alışov “DN Tau ulduzunun işıq əyrisinin təhlili” (N.Z.İsmayılov, S.Ə.Alışov) mövzusunda məruzəsini təqdim edib.

Məruzəçi qeyd edib ki, işdə klassik T Buğa tipli DN Tau ulduzunun Şamaxı Astrofizika Rəsədxanasında aparılmış fotometrik müşahidələrinin nəticələri ilə yanaşı, beynəlxalq arxivlərdən istifadə edərək 50 illik fotometrik müşahidə materialı təhlil olunub: “Qurulmuş ümumi işıq əyrisinə görə göstərilib ki, müxtəlif sezonlarda dəyişmənin amplitudu 0.5 mag təşkil edir. Müxtəlif rənglərdə qurulan parlaqlığın paylanma diaqramları göstərir ki, U və B süzgəclərində tez-tez alışmalar baş verir. Bəzi hallarda bu cür alışmaların amplitudu çox qısa müddətdə 2 mag-a çata bilir. Qırmızı diapazonda isə ulduzun parlaqlığı az dəyişir”.

S.Alışov bildirib ki, müxtəlif sezonlar üçün əvvəl tapılmış 6 günlük periodun stabilliyi araşdırılıb, periodun yeni-daha dəqiqləşdirilmış qiyməti təyin olunub: ”Göstərilib ki, müxtəlif sezonlar üçün periodun qiyməti sabit qalsa da faza sürüşməsi baş verir. Bu da ulduz səthində ləkələrin miqrasiyası ilə izah edilə bilər”.

Məruzə tədbir iştirakçıları tərəfindən maraqla qarşılanıb, mövzu ətrafında müzakirələr aparılıb, suallar cavablandırılıb.

© Bütün hüquqlar qorunur. Xəbərlərdən istifadə edərkən www.shao.az saytına istinad zəruridir.