Azərbaycan Respublikası Elm və Təhsil Nazirliyinin Nəsirəddin Tusi adına Şamaxı Astrofizika Rəsədxanasında (ŞAR) Gənc Alim və Mütəxəssislər Şurasının növbəti astroseminarı keçirilib.

Seminara rəhbərlik edən astronomiya üzrə fəlsəfə doktoru Ülkər Rüstəm seminarı giriş sözü ilə açaraq, tədbir iştirakçılarını salamlayıb və onlara məruzənin mövzusu haqqında məlumat verib.

Sonra Polşanın Jan Kochanowski Universitetinin doktorantı Şəhriyar Cəfərzadə “Təkmilləşdirilmiş Glueball Rezonans Qaz modeli” mövzusunda məruzə ilə çıxış edib.

Məruzəçi seminarda Kvant Xromo-Dinamikasının (KXD) termodinamik xassələri haqqında danışıb. O, təzyiq, entropia və başqa fiziki kəmiyyətlərin temperaturdan aslılıq funksiyalarını şərh edib. Qeyd edib ki, istifadə edilən model, kritik temperaturdan kiçik enerjilərdə KXD faza diaqramını təsvir etmək üçün istifadə olunan Adron Rezonans Qaz modelidir. Adronların xüsusi növü olan qlubollar arasındakı qarşılıqlı təsirin termodinamikaya təsiri üçün aldığımız son nəticələri tədqim edən məruzəçi, yekunda KXD faza diaqramının Neytron ulduzların xassələrini öyrənilməsindəki rolu haqqında da məlumat verib.

Məruzə seminar iştirakçıları tərəfindən maraqla qarşılanıb. Mövzu ətrafında geniş müzakirə aparılıb, suallar cavablandırılıb.

© Bütün hüquqlar qorunur. Xəbərlərdən istifadə edərkən www.shao.az saytına istinad zəruridir.