2020-ci ilin sonlarında erməni qəsbkarları tərəfindən 30 ilə yaxın müddətdə işğala məruz qalan torpaqlarımız qəhrəman şəhidlərimiz, peşəkar zabitlərimiz və igid əsgərlərimizin qanı bahasına azad olundu. Elan edilmiş atəşkəsə, beynəlxalq təşkilatların ölkəmizin ərazi bütövlüyü ilə bağlı haqlı qətnamələrinə baxmayaraq Ermənistan bu illər ərzində müxtəlif təxribatlar həyata keçirməkdən də çəkinmədi. Həmin dövrdə bu qəbil növbəti hərbi təcavüzə cavab olaraq Ali Baş Komandanın rəhbərliyi ilə Azərbaycan Respublikası Silahlı Qüvvələri işğal altındakı torpaqların azad edilməsi məqsədilə Vətən müharibəsinə başladı. 44 günlük haqq savaşımız haqqında həm beynəlxalq, həm də yerli mütəxəssislər eləcə də KİV tərəfindən səsləndirilən biri-birindən maraqlı fikirlər, faktlar dünyanın diqqətini cəlb etməklə yanaşı Azərbaycan xalqının mübarizliyini, yenilməzliyini ehtiva etdi.
Bu il ikinci dəfədir ki, möhtəşəm qələbə ilə nəticələnən Vətən müharibəsi qəhrəmanlarının xatirəsini əbədiləşdirmək məqsədilə dövlət başçısı cənab İlham Əliyev tərəfindən imzalanmış müvafiq sərancamla 27 sentyabr tarixi Azərbaycanda “Anım Günü” kimi qeyd edilir. Haqq savaşında qazanılan qələbənin təfərrüatlarını, ən maraqlı məqamları təbliğ etmək, həmçinin şəhidlik zirvəsinə ucalan oğullarımızı tanıtmaq və ehtiramla anmaq məqsədilə müharibənin canlı şahidləri olan qazilərin və şəhid ailələrinin iştirakı ilə silsilə tədbirlər keçirilir.
Günahsız mülki insanları hədəfə almaqla dəfələrlə müharibə cinayətləri törətmiş mənfur düşmənin riyakarlığı, həmişə olduğu kimi sözünə və imzasına sahib çıxmayan rəhbərlərinin yanlış siyasətinin, sahib olmadığı torpaqlara əsassız iddiasından əl çəkməməsi səbəbindən ölkəmizin ərazi bütövlüyü uğrunda mübarizəsi bu gün də davam etməkdədir. Yenə də Müzəffər Azərbaycan Ordusunun siyasi və hərbi arenada üstünlüyü qarşısında aciz qalan düşmən təxribatlara əl ataraq, beynəlxalq hüquq normalarını pozur. Lakin bütün bunlara baxmayaraq hazırda bir tərəfdən cəbhə bölgəsində düşmənin təxribatlarına layiqli cavablar verilir, digər tərəfdən isə azad olunmuş torpaqlarımızda iqtisadi irəliləyişə və mədəni həyatın bərpasına hesablanmış infrastruktur layihələr həyata keçirilir. Artıq bir sıra istiqamətlərdə, xüsusən regionun enerji ilə təminatı, yol infrastrukturunun qurulması, dəmir yolu xətlərinin və hava limanlarının tikintisi sahəsində ciddi addımlar atılmaqdadır.
Təəssüflə qeyd etməliyik ki, bu yaxınlarda daha dəqiq desək sentyabrın 12-dən 13-nə keçən gecə düşmənin daha bir təxribatını dəf edərkən şəhid olan oğullarımıza və yaralanan qazilərimizə həm dövlət səviyyəsində, həm də qədirbilən xalqımız tərəfindən diqqət və qayğı göstərilməkdədir. Üçrəngli azadlıq libasına bürünmüş qəhrəman şəhidlərimizi qarşılayarkən ürəyi qan ağlasa da, qürurla “Vətən sağ olsun”– deyən şəhid valideynləri 44 günlük savaşda misilsiz həmrəylik nümayiş etdirməsi ilə yadda qalan xalqımızın əzizinə, doğmasına çevrilib.
Bu gün böyükdən-kiçiyə hər kəs, o cümlədən elm və təhsil müəssisələrinin nümayəndələri, eləcə də N.Tusi adına Şamaxı Astrofizika Rəsədxanasının kollektivi and yerimiz olan müqəddəs məbədə üz tutaraq Vətən uğrunda canlarını fəda edən şəhidlərimizin əziz xatirəsini ehtiramla yad edir.
Allah bütün Şəhidlərimizə rəhmət eləsin, qazilərimizə şəfa versin!
© Bütün hüquqlar qorunur. Xəbərlərdən istifadə edərkən www.shao.az saytına istinad zəruridir.
