AMEA N.Tusi adına Şamaxı Astrofizika Rəsədxanasının (ŞAR) “Qalaktikalar və ulduz əmələgəlmə prosesləri” şöbəsinin kiçik elmi işçisi Zümrüd Vidadi və “Qoşa ulduzlar və eruptiv proseslər” şöbəsinin kiçik elmi işçisi Şəbnəm Ağayeva GRANDMA (Global Rapid Advanced Network Devoted to the Multi-messenger Addicts) Beynəlxalq layihəsi ilə əlaqədar Fransanın Nitse (Nice) şəhərində yerləşən Cote D'Azur Rəsədxanasında elmi ezamiyyətdədir.

İyun ayında GRANDMA layihəsi çərçivəsində 4-cü Beynəlxalq konfrans keçirilib. Tədbirdə iştirak edən rəsədxana əməkdaşları konfransda məruzə ilə çıxış ediblər. Şəbnəm Ağayeva "Tutulan qoşa ulduzlar sistemi və Volf-Raye tipli ulduzlar", Zümrüd Vidadi isə "ŞAR müşahidələri. T Buğa tipli ulduzlar və fotometriya üsulları" mövzusunda məruzə edib.

ŞAR əməkdaşları hal-hazırda həmin rəsədxanada 3 həftə ərzində davam edəcək təcrübə proqramında iştirak edirlər. Təcrübə proqramında ən müasir proqramların tədrisi həyata keçilir. Müşahidə materiallarını işləmək və müxtəlif hesablamalar aparmaq üçün "STDpipe" adlanan əməliyyat üzərindən "Python"da hesablamalar aparılır. Alınan hesablamalar MNRAS (Monthly Notices of the Royal Astronomical Society) jurnalında nəşr olunacaq məqalənin tərtibi üçün toplanılır. Eyni zamanda həmin məqalənin bir hissəsinin tərtib olunması da əməkdaşlarımız tərəfindən yerinə yetirilir. 

Qeyd edək ki, GRANDMA (Global Rapid Advanced Network Devoted to the Multi-messenger Addicts) həm fotometrik, həm də spektroskopik qurğulara malik teleskoplardan ibarət Beynəlxalq şəbəkədir. Şəbəkə tranzient (keçici) hadisələrin təqibini artırmaq və ilkin aşkarlama ilə optik təsdiqləmə arasındakı gecikməni azaltmaq üçün səmanın astronomik müşahidələrini əlaqələndirmək məqsədi daşıyır. GRANDMA proqramı əsasən LİGO və Virgo dedektorlarının üçüncü müşahidə kampaniyası zamanı elektromaqnit analoqunu tapmaq və xarakterizə etmək üçün qravitasiya dalğası siqnallarının təqibinə diqqət yetirir. Həmçinin neytrinolar və ya qamma-şüa partlamaları ilə bağlı istənilən tranzient xəbərdarlıqları, hətta fəza lokalizasiyası zəif olanları da izləməyə imkan verir.

© Bütün hüquqlar qorunur. Xəbərlərdən istifadə edərkən www.shao.az saytına istinad zəruridir.