İyunun 1-də AMEA N.Tusi adına Şamaxı Astrofizika Rəsədxanasında (ŞAR) növbəti onlayn astroseminar keçirilib.

Seminarı ŞAR-ın baş direktoru, AMEA-nın müxbir üzvü Namiq Cəlilov açaraq tədbir iştirakçılarına məruzənin mövzusu haqqında məlumat verib.

Sonra rəsədxananın "Nəzəri astrofizika və kosmologiya" şöbəsinin müdiri vəzifəsini icra edən f.r.ü.f.d., dosent Məhəmməd Nurməmmədov "BQL və onun Yupiter diskində hərəkət dinamikasının yeni riyazi yanaşma ilə təhlili" mövzusunda məruzə ilə çıxış edib.

Təqdim olunan işdə ciddi riyazi əsaslandırma ilə Yupiterdə Böyük Qırmızı Ləkə və onun planetdə fırlanma hərəkəti dinamikasının uzun müddətli dayanıqlığı tədqiq olunmuşdur. Bu məqsədlə ilk dəfə hidrodinamika və qazodinamika nəzəriyyələri tətbiq edilmişdir. Bütöv halda nəzəri əsaslandırma vasitəsilə BQL-nin dayanıqlığı, onun uzun müddət fırlanma hərəkətinin sabit dinamiksının lemma və teoremlər vasitəsilə isbatı əsaslandırılaraq yanlış fərziyyələrə də aydınlıq gətrilmişdir. Burada daxili və xarici enerji  hesabına BQL-nin uzun müddətli sirkulyasia prosesinin sabit saxlanması üçün zəruri və kafi şərtlər tapılmışdır.

Məruzə seminar iştirakçıları tərəfindən maraqla qarşılanıb. Sonda məruzənin mövzusu ətrafında geniş müzakirələr aparılıb və suallar cavablandırılıb.

© Bütün hüquqlar qorunur. Xəbərlərdən istifadə edərkən www.shao.az saytına istinad zəruridir.