May ayının 25-də AMEA N.Tusi adına Şamaxı Astrofizika Rəsədxanasında (ŞAR) növbəti onlayn astroseminar keçirilib.
Seminarı ŞAR-ın baş direktoru, AMEA-nın müxbir üzvü Namiq Cəlilov açaraq onlara məruzənin mövzusu haqqında məlumat verib.
Sonra rəsədxananın "Ulduz atmosferləri fizikası və maqnetizm" şöbəsinin aparıcı elmi işçisi, f.f.d. Əliqulu Xəlilov "Yüksək enlikdə yerləşən post - AGB tipli 89 HER (F2 Ibe) ulduzu spektrində Hα və dublet NaID xətti profili və onlarin parametrlərinin uzunperiodlu dəyişməsi" mövzusunda məruzə ilə çıxış edib.
Məruzəçi seminarda Şamaxı Astrofizika Rəsədxanasının 2-m teleskopunda alınmış spektrlər və 1955-2006-ci illərdə nəşr olunmuş işlər əsasında 89 Her ulduzunun Hα və dublet Na I D xəttinin profillərinin tədqiqindən alınan nəticələri seminar iştirakçılarına təqdim edib. Alim qeyd edib ki, tədqiqatlar nəticəsinə əsasən məlub olmuşdur ki, bu ulduzun atmosferində əvvəllər müxtəlif müəlliflər tərəfindən tapılmış qısa periodlu dəyişmələrdən başqa uzunperiodlu dəyişmələr də vardır. Aşkar olmuşdur ki, Hα və dublet Na I D xətlərinin udulma komponentinin şüa sürəti və ekvivalent eni 5000 günlük periodla dəyişir. Bundan başqa işdə spektral qoşa sistemin modeli çərçivəsində ilk dəfə olaraq qoşa sistemin orbital parametrləri hesablandığı da diqqətə çatdırılıb.
Seminar iştirakçıları tərəfindən maraqla qarşılanan məruzənin sonunda mövzu ətrafında geniş diskussiya aparılıb və suallar cavablandırılıb.
© Bütün hüquqlar qorunur. Xəbərlərdən istifadə edərkən www.shao.az saytına istinad zəruridir.
