Azəebaycan Milli Elmlər Akademiyasının (AMEA) N.Tusi adına Şamaxı Astrofizika Rəsədxanası (ŞAR) ilə Mərkəzi Elmi Kitabxana (MEK) arasında əməkdaşlıq müqaviləsi imzalanıb.

Mərkəzi Elmi Kitabxana baş tutan tədbirdə MEK-in baş direktoru, professor Məmməd Əliyev AMEA-nın müəssisələri, elmi-tədqiqat institutları ilə əməkdaşlığın əhəmiyyətini vurğulayıb. Həyata keçirilən sıx əməkdaşlığın nəticəsi kimi yaxın zamanlarda AMEA-da çalışan gənc mütəxəssislərin MEK-də keçirilən “Vikipediya” təlimlərinə cəlb olunacaqlarını diqqətə çatdırıb.

ŞAR-ın baş direktoru, AMEA-nın müxbir üzvü Namiq Cəlilov isə çıxışı zamanı iki müəssisə arasında imzalanan müqavilənin alimlərin elmi fəaliyyətlərinə böyük səmərə verəcəyini bildirib. Belə ki, yaradılmış verilənlər bazası vasitəsilə fundamental elm sahələrindəki yenilikləri izləmək mütəxəssislərin işini daha da asanlaşdıracaq.

Daha sonra iki müəssisə arasında əməkdaşlıq haqqında müqavilə imzalanıb.

Qeyd edək ki, ŞAR-ın kitabxanasında elektron kataloq yaratmaq məqsədi ilə imzalanan sazişə əsasən, kitabxanada tətbiq edilən İRBİS 64+AKİS-in (Avtomatlaşdırılmış Kitabxana İnformasiya Sistemi) işinə mütəmadi olaraq Mərkəzi Elmi Kitabxana tərəfindən Avtomatlaşdırma və proqram təminatı şöbəsinin mütəxəssisləri texnoloji dəstək verəcək. Həmçinin müqavilədə Şamaxı Astrofizika Rəsədxanasının Elmi kitabxanasının verilənlər bazalarının Mərkəzi Elmi Kitabxananın saytında oxucuların onlayn istifadəsinə təqdim edilməsi də qeyd olunub.

Bununla yanaşı, müqavilədə iki qurumun birlikdə elmi konfrans və seminarlar, təlim və təcrübələr keçirməsi, eyni zamanda yeni layihələrə imza ataraq birgə tədqiqatların aparılması da nəzərdə tutulur.

© Bütün hüquqlar qorunur. Xəbərlərdən istifadə edərkən www.shao.az saytına istinad zəruridir.