May ayının 11-də AMEA N.Tusi adına Şamaxı Astrofizika Rəsədxanasında (ŞAR) növbəti onlayn astroseminar keçirilib.
Seminarı ŞAR-ın baş direktoru, AMEA-nın müxbir üzvü Namiq Cəlilov açaraq iştirakçıları salamlayıb və onlara məruzənin mövzusu haqqında məlumat verib.
Sonra rəsədxananın "Planetlər və kiçik səma cisimləri" şöbəsinin baş elmi işçisi, f.r.e.d., AMEA-nın müxbir üzvü Əyyub Quliyev və fəlsəfə doktoru Rüstəm Quliyev "Qısa perihelli komet qruplarının mənşəyi" mövzusunda məruzə ilə çıxış ediblər.
Məruzəçi ilk öncə kometlərin yaranması ilə bağlı müxtəlif alimlərin irəli sürdüyü nəzəriyyələri seminar iştirakçıların diqqətinə çatdırıb. Daha sonra isə qısa perihelli komet qruplarının klassifikasiyası haqqında danışıb. Alim qeyd edib ki, bu vaxtadək aşkar olunan qısa perihelli kometlərin 83 faizi Kreutz (SOHO) qrupuna, 17 faizi isə Kracht, Marsden və Meyer qruplarına aid edilir.
Təqdim olunan işdə göstərilmişdir ki, Kreutz ailəsi kometlərinin periheli iki müstəvinin yaxınlığında cəmləşmişdir. İkinci müstəviyə nisbətən komet orbitlərinin uzaq düyün nöqtələri təxminən 2 astronomik vahid məsafədə nəzərə çarpan maksimuma malikdir. Konkret bir nümunə göstərir ki, perihelinin konsentrasiyası ilə bağlı iki fərziyyə - "Bir nöqtə ətrafında cəmləşmə" və "İki müstəvi yaxınlığında cəmləşmə" nəzəriyyələri biri-birilə uyğunluq təşkil edir. İşdə Kreutz ailəsi üçün orbital meyllərin paylanması ilk dəfə müəlliflərdən birinin fərziyyəsi çərçivəsində yeni əsasda nəzərdən keçirilir. Təxminən 90°-yə yaxın kəskin maksimum dəyər, ehtimal ki, meteoroid cisimlərinin protokomet nüvələrinə təsirinin köndələn xarakter daşıdığını göstərir.
Seminar iştirakçıların marağına səbəb olan məruzənin yekununda, mövzu ətrafında geniş diskussiya aparılıb və suallar cavablandırılıb.
© Bütün hüquqlar qorunur. Xəbərlərdən istifadə edərkən www.shao.az saytına istinad zəruridir.
