May ayının 4-də AMEA N.Tusi adına Şamaxı Astrofizika Rəsədxanasında (ŞAR) növbəti onlayn astroseminar keçirilib.

Seminarı ŞAR-ın baş direktoru, AMEA-nın müxbir üzvü Namiq Cəlilov açaraq iştirakçıları salamlayıb və onlara məruzənin mövzusu haqqında məlumat verib.

Sonra rəsədxananın "Nəzəri astrofizika və kosmologiya" şöbəsinin aparıcı elmi işçisi, f.r.f.d., dosent Rəsmiyyə Qasımova "Maqnitləşmiş mühitlərdə aşağı enerjili antineytrinoların elektronlardan antistoks səpilməsi hesabına sürətlənməsi" mövzusunda məruzə ilə çıxış edib.

Təqdim olunan işdə güclü maqnitləşmiş mühitlərdə, o cümlədən kosmik və astrofiziki obyektlərdə maqnit sahəsi, temperatur və sıxlıq kimi mühit faktorları nəzərə alınmaqla elektronların spinlərinin eninə polyarlaşması halında antineytrinoların elektronlardan səpilməsi zamanı enerji itkisi və prosesin kəsiyi üçün ümumi düstur alınmış, enerji itkisinin antineytrino və elektronların enerjilərindən, maqnit sahəsinin induksiya vektorunun qiymətindən, temperaturdan, sıxlıqdan və elektronların spinlərindən asılılığı araşdırılmışdır. Antineytrino-elektron səpilməsi üçün alınmış düsturlar eyni zamanda neytrino-pozitron səpilməsini də təsvir edir. Müəyyən edilmişdir ki, maqnit induksiyasının çox da böyük olmayan qiymətlərində və aşağı enejili antineytrinolar (neytrinolar) halında antistoks səpilmələri hesabına ultra-relyativistik elektronların (pozitronların) öz enerjilərini səpilən antineytrinolara (neytrinolara) verməsi nəticəsində elektron (pozitron) qazının soyuması və neytral zərrəciklər olan antineytrinoların (neytrinoların) sürətlənməsi baş verir.

Seminar iştirakçıların marağına səbəb olan məruzənin yekununda, mövzu ətrafında geniş diskussiya aparılıb və suallar cavablandırılıb.

© Bütün hüquqlar qorunur. Xəbərlərdən istifadə edərkən www.shao.az saytına istinad zəruridir.