Aprel ayının 28-də AMEA N.Tusi adına Şamaxı Astrofizika Rəsədxanasında (ŞAR) növbəti onlayn astroseminar keçirilib.
Seminara rəhbərlik edən professor Nəriman İsmayılov tədbiri giriş sözü ilə açaraq iştirakçıları salamlayıb və onlara məruzənin mövzusu haqqında məlumat verib.
Sonra rəsədxananın "Kosmik plazma və heliogeofiziki problemlər" şöbəsinin aparıcı elmi işçisi, fizika-riyaziyyat üzrə fəlsəfə doktoru Şirin Hüseynov "Santimetrlik dalğa uzunluğunda Günəş alışmalarının dinamik üsullarla tədqiqi" mövzusunda məruzə ilə çıxış edib.
İşdə, Qazaxıstan Respublikasının İonosfer İnstitutunun 12 m-lik Radioteleskopunda 2011÷15–ci illərdə, f=3 QHs – tezlikdə alınmış Günəş alışmalarının müşahidə məlumatları əsasında tərtib edilən zaman sıraları tədqiq olunmuşdur. Məruzəçi bildirib ki, tədqiqat, son zamanlar elm və texnikanın müxtəlif sahələrindən alınan qeyri-xətti və qeyri-stasionar proseslərin əks olunduğu zaman sıralarının riyazi işlənməsi üçün istifadə edilən effektiv üsullar (fraktal tədqiqat və empirik modlara ayırma) əsasında aparılmışdır. Günəş alışmalarının zaman görüntüləri bir-birindən fərqli olsa da, onlarda 20÷150 saniyəlik qeyri-xətti kvaziperiodik döyüntülər aşkar edilmişdir. Bu döyüntülərin davam etmə dövrünün təyin olunması və onların amplitudlarının qiymətləndirilməsi alışma hadisələrinin və kosmik havanın proqnozlaşdırılması üçün əlavə göstərici ola bilər.
Məruzə seminar iştirakçıları tərəfindən maraqla qarşılanıb və çıxışın sonunda mövzu ətrafında müzakirələr aparılıb, suallar cavablandırılıb.
© Bütün hüquqlar qorunur. Xəbərlərdən istifadə edərkən www.shao.az saytına istinad zəruridir.
