Aprel ayının 13-də AMEA N.Tusi adına Şamaxı Astrofizika Rəsədxanasında (ŞAR) növbəti onlayn astroseminar keçirilib.
Seminara rəhbərlik edən fizika riyaziyyat üzrə elmlər doktoru, professor Nəriman İsmayılov tədbiri giriş sözü ilə açaraq iştirakçıları salamlayıb və onlara məruzənin mövzusu haqqında məlumat verib.
Sonra rəsədxananın "Qoşa ulduzlar və eruptiv proseslər" şöbəsinin müdiri a.f.d., dosent Səbinə Məmmədova "Be Herbig tipli HD53367 ulduzunun spektral müşahidəsi. İlkin nəticələr" mövzusunda məruzə ilə çıxış edib.
Məruzəçi çıxış zamanı Be Herbig tipli HD 53367 massiv qoşa ulduzun ŞAR-ın 2m teleskopunun Kasseqren fokusunda, optik lifli eşele spektroqrafda (Shamakhy Fibre Echelle Spectrograph), yüksək spektral ayırdetmə (R = 28000) ilə alınmış CCD spektlərinin nəticələrini şərh edib. O, bildirib ki, λλ3900–7500 ÅÅ dalğa uzunluğu oblastında, ulduzun spektrində - hidrogenin Balmer seriyasının (Ha - He) xətləri, neytral natriumun (D1,2 NaI) və birqat ionlaşmış kalsiumun (H və K CaII) rezonans xətləri eləcə də HeI l5876 Å xətti analiz olunur.
Seminar iştirakçıların marağına səbəb olan məruzənin yekununda, mövzu ətrafında geniş diskussiya aparılıb və suallar cavablandırılıb.
© Bütün hüquqlar qorunur. Xəbərlərdən istifadə edərkən www.shao.az saytına istinad zəruridir.
