Aprelin 6-da AMEA N.Tusi adına Şamaxı Astrofizika Rəsədxanasında (ŞAR) növbəti onlayn astroseminar keçirilib.
Seminara rəhbərlik edən fizika riyaziyyat üzrə elmlər doktoru, professor Nəriman İsmayılov tədbiri giriş sözü ilə açaraq iştirakçıları salamlayıb və onlara məruzənin mövzusu haqqında məlumat verib.
Sonra AMEA Naxçıvan Bölməsinin Batabat Astrofizika Rəsədxanasının "Səma cisimlərinin fotometriyası" şöbəsinin elmi işçisi Ülvü Vəliyev "WTTS ulduzlarında ulduzətrafı diskin təkamül xüsusiyyətləri" mövzusunda məruzə ilə çıxış edib.
Məruzəçi seminarda statistik əhəmiyyətli sayda Günəş kütləli cavan ulduzların alt qrupu sayılan WTTS ulduzlarının spectral enerji paylanma (SEP) əyrilərinin təhlil nəticələrindən danışıb. O, qeyd edib ki, proqrama seçilmiş 45 WTTS ulduzla yanaşı müqayisə üçün 3 klassik T Buğa ulduzu (CTTS) və standart ulduzlar da əlavə olunmuşdur. SEP əyriləri yerüstü və kosmik rəsədxanalar tərəfindən alınmış enlizolaqlı fotometrik ölçmələr əsasında 0.36-100 μm dalğa uzunluğu intervalında qurulmuşdur.
İşdə göstərilib ki, alınan SEP əyriləri İQ şüalanma artıqlığının xarakterinə görə iki qrupa bölünür. I qrup ulduzlar yalnız λ≥12 mkm intervalında, II qrup ulduzlar isə həm də əlavə olaraq 2μm<λ<12μm intervalında İQ şüalanma artıqlığı göstərir. Ulduzların 24%-də ultrabənövşəyi şüalanma artıqlığı müşahidə olunmuşdur və belə ulduzların əksəriyyəti II qrupa aiddir. Bu fakta əsasən məlum olmuşdur ki, WTTS ulduzlarının bir qismi disk akkresiyası əlamətləri göstərir.
Proqram ulduzlarının fiziki parametrləri, şüalanma artıqlığı parametrləri, kütlə və yaşları təyin edilərək ki, I qrup ulduzların yaşının II qrup ulduzlarınkına nisbətən bir tərtib çox olduğu müəyyən edilmişdir.
Məruzə seminar iştirakçıların marağına səbəb olub, mövzu ətrafında diskussiya aparılıb və suallar cavablandırılıb.
© Bütün hüquqlar qorunur. Xəbərlərdən istifadə edərkən www.shao.az saytına istinad zəruridir.
