Mart ayının 30-da AMEA N.Tusi adına Şamaxı Astrofizika Rəsədxanasında (ŞAR) növbəti onlayn astroseminar keçirilib.

Seminara rəhbərlik edən professor Nəriman İsmayılov tədbiri giriş sözü ilə açaraq iştirakçıları salamlayıb və onlara məruzənin mövzusu haqqında məlumat verib.

Sonra rəsədxananın "Ulduz atmosferləri fizikası və maqnetizm" şöbəsinin aparıcı elmi işçisi, fizika-riyaziyyat üzrə fəlsəfə doktoru, dosent Sabir Əliyev "Kimyəvi Pekulyar (CP)θ Auriga maqnit ulduzunun kompleks tədqiqi" mövzusunda məruzə ilə çıxış edib.

Məruzəçi seminarda qoca (logt= 8.7) Auriga dağınıq ulduz topasının θ Aur (HD 40312) maqnit ulduzunun kompleks tədqiqinin əsas nəticələrini təqdim edib. O, bildirib ki, işdə maqnit sahəsinin əsas pekulyar elementlərin (Si, Mn, Cr, Ca və s.) intensivliklərinin və parlaqlığın faza asılılıqlarının müqayisə vasitəsilə ulduzun səthində maksimum pekulyar (P) və (nisbətən) normal (N) oblastlara uyğun fazalar müəyyən edilmişdir (ϕ(P)=0.05; ϕ(N)=0.5). Pekulyarlıq effekti nəzərə alınmaqla θ Aur ulduzunun atmosfer və təkamül parametrləri təyin edilmişdir. Aşkar edilmişdir ki, θ Aur ulduzu Baş ardıcıllıq zolağının son (ZAMS) mərhəsində yerləşir və qırmızı nəhəng mərhələsinə keçid ərəfəsindədir.

Seminar iştirakçıları tərərfindən maraqla qarşılanan məruzənin sonunda mövzu ətrafında geniş müzakirələr aparılıb və suallar cavablandırılıb.

© Bütün hüquqlar qorunur. Xəbərlərdən istifadə edərkən www.shao.az saytına istinad zəruridir.