16 mart 2022-ci il tarixdə AMEA N.Tusi adına Şamaxı Astrofizika Rəsədxanasında (ŞAR) növbəti onlayn astroseminar keçirilib.

Seminara rəhbərlik edən professor Nəriman İsmayılov tədbiri giriş sözü ilə açaraq iştirakçıları salamlayıb və onlara məruzələrin mövzusu haqqında məlumat verib.

Sonra rəsədxananın "Ulduz atmosferləri fizikası və maqnetizm" şöbəsinin elmi işçisi Aynurə Həsənova "Çili rəsədxanalarının elmi fəaliyyət istiqamətləri və onlarla əməkdaşlıq aspektləri" mövzusunda məruzə ilə çıxış edib.

Məruzəçi ilk öncə Çilidə yerlən rəsədxanalar haqqında ümumi məlumat verib, həmin rəsədxanaların müşahidə imkanlarını, rəsədxanalarda həyata keçirilən böyük layihələrdən danışıb. A.Həsənova Çili rəsədxanaları ilə əməkdaşlıq aspektlərini, o cümlədən onların data bazaları işləmək imkanlarını şərh edib.

Daha sonra prof. N.İsmayılov 25 dekabr 2021-ci ildə kosmosa çıxarılmış dünyanın ən böyük kosmik teleskopu olan Ceyms Vebb teleskopu haqqında məruzə edib. O, bildirib ki, teleskop 18 ədəd 6-bucaqlı seqment şəkində hazırlanmış yığılan və kosmosda açılan güzgü dəstindən ibarətdir. Açılmış vəziyyətdə teleskopun güzgüsü 6.5 m-lik güzgü qədər sahəni tutur. Bu teleskop məşhur Habbl teleskopu ilə müqayisədə 6.25 dəfə çox işıq seli toplama gücünə malikdir. Teleskopda böyük partlayışdan dərhal sonra yaranmış ulduz və qalaktikalar, ekzoplanetlər, qravitasiya linzaları və kvazarlar müşahidə olunacaqdır. Bütün müşahidələr 0.6-28.3 mkm diapazonunda, yəni qırmızı, yaxın və orta infraqırmızı diapazonda həyata keçiriləcəkdir. Alim qeyd edib ki, teleskopda digər ölkə alimləri ilə birgə müşahidə vaxtı sifariş də vermək olar.

Seminarın sonunda geniş müzakirələr aparılıb və suallar cavablandırılıb.

© Bütün hüquqlar qorunur. Xəbərlərdən istifadə edərkən www.shao.az saytına istinad zəruridir.