Mart ayının 2-də AMEA N.Tusi adına Şamaxı Astrofizika Rəsədxanasında (ŞAR) növbəti onlayn astroseminar keçirilib.
Seminara rəhbərlik edən AMEA-nın müxbir üzvü Namiq Cəlilov tədbiri giriş sözü ilə açaraq iştirakçıları salamlayıb və onlara məruzənin mövzusu haqqında məlumat verib.
Sonra seminarda "ŞAR-ın 2 m-lik teleskopunda alınan müşahidə materiallarının ilkin emalı və arxivləşdirilməsi" mövzusunda məruzə səsləndirilib. Çıxışa ilk olaraq müşahidə qrupunun təşkilatçısı kimi rəsədxananın icraçı direktoru professor Nəriman İsmayılov başlayıb. O, AMEA ŞAR-da arxiv materiallarının toplanması və arxivləşdirilməsi barədə qısa məlumat verərək, ardınca isə müşahidə qrupunun 2020-ci ildə ŞAR-ın 2 m-lik teleskopunda alınan müşahidə materiallarının emalı haqqında ətraflı danışıb.
Daha sonra “Qalaktikalar və ulduzəmələgəlmə prosesləri” şöbəsinin elmi işçisi Şəfəq İsmayılova, elmi işçi Ülviyyə Bəşirova, “Ulduz atmosferləri fizikası və maqnetizm” şöbəsinin elmi işçiləri, Aynur Abdulkərimova və Aynurə Həsənova ilkin emal prosesində istifadə olunan metod və proqramlar haqqında geniş məruzə ediblər.
Qeyd olunub k, ilkin emal prosesinin əsas məqsədi AMEA ŞAR-da arxiv bazasının yaradılması, bu bazadan dünya standartlarına uyğun olaraq istifadə olunmasıdır.
Seminarın sonunda məruzə olunan mövzu ətrafında geniş müzakirələr aparılıb və suallar cavablandırılıb.
© Bütün hüquqlar qorunur. Xəbərlərdən istifadə edərkən www.shao.az saytına istinad zəruridir.
