9 mart 2022-ci il tarixdə AMEA N.Tusi adına Şamaxı Astrofizika Rəsədxanasında (ŞAR) növbəti onlayn astroseminar keçirilib.

Seminara rəhbərlik edən professor Nəriman İsmayılov tədbiri giriş sözü ilə açaraq iştirakçıları salamlayıb və onlara məruzənin mövzusu haqqında məlumat verib.

Sonra rəsədxananın "Qalaktikalar və ulduzəmələgəlmə prosesləri" şöbəsinin aparıcı elmi işçisi, fizika-riyaziyyat üzrə fəlsəfə doktoru, dosent Nazim Hüseynov "NGC 7469 Seyfert qalaktikasının fotometrik dəyişkənliyi" mövzusunda məruzə ilə çıxış edib.

Məruzəçi çıxış zamanı Seyfert qalaktikası NGC 7469-un 2016-2019-cu illərdə BVRİ süzgəclərində aparılmış fotometrik müşahidələrin nəticələrini seminar iştirakçılarına təqdim edib. O, bildirib ki, ŞAR-ın 60 sm-lik teleskopunda aparılmış müşahidələrdə ayrı-ayrı vaxtlarda 3 alışma qeydə alınmışdır. Birinci alışma qeydə alınanlardan ən güclüsü olub, BVRİ süzgəclərində parlaqlığın dəyişməsinin amplitudu uyğun olaraq В = 0^m.272; V=0^m.181; Rc=0.173; İc=0^m.125 olmuşdur. İkinci alışma orta gücdə olmuşdur və dəyişmənin amplitudu В = 0^m.098; V=0^m.047; Rc=0.093; İc=0^m.036 təşkil etmişdir. Üçüncü alışma isə birinci alışma ilə müqayisə olunan tərtibdə В = 0^m.207; V=0^m.168; Rc=0^m.119; İc=0^m.065 olmuşdur. Müşahidələrin nəticəsinə əsasən, hesab olunur ki, NGC 7469 Seyfert qalaktikasının bü cür fəal olmasının səbəbi onun nüvəsinin yaxınlığında güclü ulduzəmələgəlmə proseslərinin getməsi və yaxın ətrafında yerləşən IC 5283 qalaktikası ilə qarşılıqlı təsirdə olması ola bilər.

Seminar iştirakçıları tərərfindən maraqla qarşılanan məruzənin sonunda mövzu ətrafında geniş müzakirələr aparılıb və suallar cavablandırılıb.

© Bütün hüquqlar qorunur. Xəbərlərdən istifadə edərkən www.shao.az saytına istinad zəruridir.