Fevral ayının 26-da AMEA N.Tusi adına Şamaxı Astrofizika Rəsədxanasının kollektivi Xocalı soyqırımının 30-cu ildönümü ilə əlaqədar Xocalı abidəsini ziyarət edib.
Şamaxı Astrofizika Rəsədxanasının rəhbərliyi və rəsədxananın Bakı və Şamaxı bölmələrinin əməkdaşları Xocalı soyqırımı qurbanlarının xatirəsinə hörmət və ehtiram əlaməti olaraq abidə önünə gül dəstələri qoyublar.
Azərbaycan xalqının XX əsrdə üzləşdiyi dəhşətli faciə - Xocalı soyqırımı Holokost, Xatın, Lidisa, Oradur, Sonqmi soyqırımı kimi insanlıq tarixinə düşmüş qanlı olaylara bərabər bir hadisədir. Bu soyqırım xalqımızın cəsarətini sarsıtmaq, mübarizə əzmini qırmaq, tarixi torpaqlarımızın bir qisminin işğalı ilə barışmağa məcbur etmək təşəbbüsü idi. Lakin öz şanlı tarixindən güc alan qəhrəman xalqımız Müzəffər Ali Baş Komandan İlham Əliyevin rəhbərliyi ilə düşmənin bu arzusunu ürəyində qoydu, torpaqlarımız erməni işğalından azad edilərək öz gerçək sahiblərinə qaytarıldı.
Soyqırım qurbanlarını hörmət və ehtiramla yad edir, onlara Allahdan rəhmət diləyirik.
© Bütün hüquqlar qorunur. Xəbərlərdən istifadə edərkən www.shao.az saytına istinad zəruridir.
