Fevralın 9-da AMEA N.Tusi adına Şamaxı Astrofizika Rəsədxanasında (ŞAR) növbəti onlayn astroseminar keçirilib.

Seminara rəhbərlik edən AMEA-nın müxbir üzvü Namiq Cəlilov tədbiri giriş sözü ilə açaraq iştirakçıları salamlayıb və onlara məruzənin mövzusu haqqında məlumat verib.

Sonra rəsədxananın "Ulduz atmosferləri fizikası və maqnetizm" şöbəsinin böyük elmi işçisi, fizika-riyaziyyat üzrə fəlsəfə doktoru, dosent Zahir Səmədov "φCas (F0Ia)  ifrat nəhəng ulduzunun atmosferinin tədqiqi" (Z.A.Səmədov, G.M.Hacıyeva, S.Ş.Rəcəbova) mövzusunda məruzə ilə çıxış edib.

Məruzəçi atmosfer modeli üsulu ilə HR382 (φCas ,F0Ia) ulduzunun atmosferinin tədqiqi barədə danışıb. O, bildirib ki, təqdim olunan işdə [c1], Q fotometrik indekslərinin və hidrogenin Balmer seriyasının  müşahidə və nəzəri qiymətlərini müqayisə  edərək ulduzun effektiv temperaturu Teff və səthində ağırlıq qüvvəsinin təcili g təyin edilmişdir: Teff=7350±200K, logg=0.4±0.2. FeII xətlərinə əsasən isə mikroturbulent hərəkət sürəti təyin edilmişdir: ξt=7.5 km⁄san. Ulduzun atmosferində elementlərin miqdarı hesablanmış və Günəşdə olan miqdarla müqayisə edilmişdir. Nəticədə karbon elementinin azlığı, azot, natrium elementlərinin artıqlığı aşkar edilmişdir.

Sonda mövzu ətrafında geniş diskussiya aparılıb və suallar cavablandırılıb.

© Bütün hüquqlar qorunur. Xəbərlərdən istifadə edərkən www.shao.az saytına istinad zəruridir.