Tanınmış astronom alim, fizika-riyaziyyat üzrə fəlsəfə doktoru, dosent Əzizə Rəsul qızı Həsənova 62 yaşında vəfat edib.
Əzizə Rəsul qızı Həsənova 25 oktyabr 1960–ci ildə Ağdam rayonunun Gülablı kəndində anadan olmuşdur. O, 1982–ci ildə Bakı Dövlət Universitetinin Fizika fakültəsini “Astrofizika” ixtisası üzrə bitirmiş və təyinatla AMEA N.Tusi adına Şamaxı Astrofizika Rəsədxanasında (ŞAR) müşahidəçi astronom kimi praktik astrofizika sahəsində elmi fəaliyyətə başlamışdır.
1982-1985-cü illərdə Krım Astrofizika Rəsədxanasında akademik A.A.Boyarçukun rəhbərliyi altında praktik astrofizika sahəsində təcrübə keçmişdir.
Ə.R.Həsənova sonrakı illərdə ŞAR-ın 2 metrlik teleskopunda B, A və F tipli ifratnəhəng ulduzların müntəzəm spektral müşahidələrini aparmış və bu obyektlərin tədqiqi sahəsində bir sıra yeni, maraqlı elmi nəticələr almışdır.
Ə.R. Həsənova 15 oktyabr 2005-ci ildə Bakı Dövlət Universitetinin fizika fakültəsinin nəzdində fəaliyyət göstərən dissertasiya şurasında 01.03.02 – “astrofizika, radioastronomiya” ixtisası üzrə, “A və F ifratnəhəng ulduz atmosferlərinin spektrofotometrik tədqiqi” mövzusunda namizədlik dissertasiyasını müvəffəqiyyətlə müdafiə etmiş və fizika-riyaziyyat elmləri namizədi elmi dərəcəsi diplomunu almışdır.
28 mart 2016-cı ildə Ə.R. Həsənovaya Azərbaycan Respublikasının Prezidenti Yanında Ali Attestasiya Komissiyası tərəfindən dosent elmi adı verilmişdir.
ŞAR-da işlədiyi müddətdə onun tərəfindən, Qalaktika müstəvisində və yüksək Qalaktik enliklərdə yerləşən ifratnəhəng ulduzların fiziki parametrləri təyin edilmiş, belə ifratnəhənglərin kimyəvi tərkibinin fərqli olduğu aşkar edilmiş, onların mümkün genetik əlaqələri araşdırılmışdır. Bu tədqiqatlarda bir sıra yeni nəticələr alınmışdır. Model üsulu ilə 89 Her, φ Cas, ν Her, α Lyr, γ Gem ulduzlarının atmosfer parametrləri və kimyəvi tərkibi təyin edilmişdir. İlk dəfə göstərilmişdir ki, 89 Her ulduzu spektrində müşahidə olunan Ha xətti profilində udulma komponentlərinin şüa sürətləri, udulma və şüalanma komponentlərinin ekvivalent enləri, həmçinin ulduzun parlaqlığı 283 günlük periodla sinxron olaraq dəyişir. Alınmış bu nəticələr ulduzun qoşalığı haqqında olan fikirlərlə tamamilə üst-üstə düşür.
Ə.R.Həsənova bir sıra MDB ölkələrinin alimləri ilə elmi əlaqələr qurmuş, onlarla əməkdaşlıq etmişdir. Onun 65-dən çox məqaləsi yerli və xarici jurnallarda çap olunmuşdur. Elmi tədqiqat işləri ilə bağlı çoxsaylı elmi konfranslarda məruzələrlə çıxış etmişdir.
O, 2010-2013-cü illərdə BDU – nun fizika fakultəsində magistrlərə “nəzəri astrofizika” kursundan dərs demişdir.
Ə.R. Həsənova Azərbaycan Respublikasinin Prezidenti Yanında Ali Attestasiya Komissiyası tərəfindən ŞAR-da yaradılan və 2013-2018-ci illərdə fəaliyyət göstərən FD.01.241 dissertasiya şurasının Elmi katibi vəzifəsində işləmişdir.
ŞAR-da işlədiyi müddət ərzində elmi işçi, böyük elmi işçi, aparıcı elmi işçi və şöbə müdiri vəzifələrində çalışmışdır.
Müxtəlif illərdə ŞAR Elmi Şurasının və ŞAR Həmkarlar Təşkilatı bürosunun üzvü olmuşdur.
ŞAR-ın “Ulduz atmosferləri fizikası və maqnetizm” şöbəsinin aparıcı elmi işçisi, fizika-riyaziyyat üzrə fəlsəfə doktoru, dosent Əzizə Rəsul qızı Həsənova 15 fevral 2022-ci il tarixdə vaxtsız vəfat etmişdir. Əzizə xanımın əziz xatirəsi onu sevənlərin qəlbində daim yaşayacaqdır.
Allah rəhmət eləsin!
© Bütün hüquqlar qorunur. Xəbərlərdən istifadə edərkən www.shao.az saytına istinad zəruridir.
