Fevralın 9-da AMEA N.Tusi adına Şamaxı Astrofizika Rəsədxanasında (ŞAR) növbəti onlayn astroseminar keçirilib.

Seminara rəhbərlik edən fizika riyaziyyat üzrə elmlər doktoru, professor Nəriman İsmayılov tədbiri giriş sözü ilə açaraq iştirakçıları salamlayıb və onlara məruzənin mövzusu haqqında məlumat verib.

Sonra rəsədxananın Baş direktoru, AMEA-nın müxbir üzvü Namiq Cəlilov "Kosmik plazma axınlarında Kelvin-Helmholtz tipli MHD dayanıqsızlıqları” (N.Cəlilov, R.İsmayılov) mövzusunda məruzə ilə çıxış edib.

Təqdim olunan işdə irimiqyaslı kosmik plazma axınlarında yaranan MHD Kelvin-Helmholtz tipli plazma dayanıqsızlıqları mexanizmi tədqiq olunur. Məruzəçi qeyd edib ki, tədqiqat işində maqnit sahəsi istiqamətinə nəzərən plazma anizotropluğu və maqnit sahəsi boyunca istilik seli nəzərə alınmaqla dayanıqsızlığın inkrementi plazma parametrlərindən asılı olaraq hesablanmışdır. Müxtəlif sürətli plazma axınlarının kontakt səthində yaranan burulğanlar keçid zonasının enindən ciddi şəkildə asılıdır. Problemin həlli üçün Baoltsman-Vlasov kinetik tənliklərdən alınmış 16-momentli MHD tənliklər sistemindən istifadə edilmişdir. Namiq Cəlilov alınmış nəticələrin Günəş küləyi CİR-lərinə tətbiq edildiyini diqqətə çatdırıb. 

Məruzə seminar iştirakçıların marağına səbəb olub, mövzu ətrafında diskussiya aparılıb və suallar cavablandırılıb.

© Bütün hüquqlar qorunur. Xəbərlərdən istifadə edərkən www.shao.az saytına istinad zəruridir.