29 dekabr 2021-ci il tarixində Azərbaycan Milli Elmlər Akademiyası (AMEA) Nəsirəddin Tusi adına Şamaxı Astrofizika Rəsədxanasında (ŞAR) Elmi Şuranın növbəti hesabat iclası keçirilib.
Tədbiri elmi şuranın sədri, AMEA-nın müxbir üzvü Namiq Cəlilov açaraq, gündəlikdə duran məsələlər barədə şura üzvlərinə məlumat verib.
İclasda ŞAR-ın elmi-təşkilat sektorunun "Təhsil", "İnformasiya təminatı və ictimaiyyətlə əlaqələr" şöbələri və ŞAR Elmi Kitabxanasının illik fəaliyyəti barədə hesabatlar dinlənilib.
Daha sonra Şamaxı Astrofizika Rəsədxanasının Baş direktoru, AMEA-nın müxbir üzvü Namiq Cəlilov rəsədxananın 2021-ci il üçün elmi və elmi-təşkilati fəaliyyətinə dair yekun hesabat məruzəsi ilə çıxış edib.
Namiq Cəlilov bildirib ki, hesabat dövründə Şamaxı Astrofizika Rəsədxanası öz işini AMEA Rəyasət Heyəti tərəfindən müəyyən edilmiş prioritet istiqamətlər çərçivəsində həyata keçirmişdir. Cari ildə Rəsədxanada Azərbaycan Respublikası Prezidentinin fərman və sərəncamlarının, Azərbaycan Respublikası Nazirlər Kabinetinin qərar və sərəncamlarının, habelə dövlət proqramlarının icrası uğurla həyata keçirilib. Bundan başqa AMEA Rəyasət Heyəti tərəfindən təsdiq edilmiş elmi istiqamətlər proqramına uyğun olaraq 1 elmi istiqamət – “Səma cisimlərinin fizika və dinamikası” sahəsində 2 problemə aid 8 mövzu üzrə 24 tədqiqat işi aparılmış və mühüm elmi nəticələr əldə edilmişdir. Hesabat ilində 45 məqalə, 2 kitab çap olunub, məqalələrdən 6-sı Web of Science və SCOPUS bazalarına daxil olan impakt faktorlu jurnallarda dərc olunub. Rəsədxananın mütəxəssislərinin əsərlərinə il ərzində dünya ədəbiyyatında 100-dən çox istinad olunmuşdur. Alınan elmi nəticələr müxtəlif beynəlxalq və respublika səviyyəli elmi konfrans, simpozium və seminarlarda müzakirə edilərək mütəxəsisslər tərəfindən yüksək qiymətləndirilmiş və nüfuzlu beynəlxalq və yerli jurnallarda dərc olunub.
Daha sonra natiq 2021-ci ildə rəsədxanada keçirilən beynəlxalq və yerli konfranslardan danışıb. Qeyd edib ki, ŞAR-da görkəmli elm xadimi, AMEA-nın Fəxri üzvü, dünya şöhrətli alim Lütfi Zadənin 100 illik yubileyinə həsr olunmuş konfrans, həmçinin akademik Hacıbəy Sultanovun 100 illik yubileyinə həsr olunmuş “Günəş sistemi cisimlərinin fizika və dinamikasının tədqiqində müasir istiqamətlər” mövzusunda beynəlxalq konfrans keçirilib.
“Nizami Gəncəvi ili” çərçivəsində ŞAR-da FRTEB-in, AMEA Humanitar və İctimai Elmlər Bölməsinin birgə təşkilatçılığı ilə “Nizami Gəncəvi yaradıcılığında riyazi-astronomik baxış” mövzusunda VIII “Fizika və lirika” konfransı, eləcə də Azərbaycan Dövlət Pedoqoji UniversitetininŞamaxı filialı ilə birlikdə “Nizami Gəncəvi yaradıcılığında kosmopoloji modellər“ mövzusunda elmi-praktiki konfrans keçirilib.
Çıxış zamanı alim elmlə təhsilin inteqrasiyası istiqamətində görülən bir sıra işlərdən də danışıb. O, qeyd edib ki, Astronomiya elminin məktəblilər arasında təbliği məqsədilə Bakıda fəaliyyət göstərən N.Tusi adına 173 saylı, 283 saylı, 10 saylı, 192 saylı tam orta məktəb, eləcə də S. Rüstəm adına xarici dillər təmayüllü gimnaziya, Şamaxı rayonu Sabir qəsəbə tam orta məktəbi, Lənkəran rayon Biləsər kənd tam orta məktəbi il əlaqə qurulub və bu məktəblərdə rəsədxanada çalışan alim və mütəxəssislər tərəfindən onlayn mühazirə-seminarlar təşkil edilib.
Çıxışın sonunda əməkdaşları qarşıdan gələn Dünya Azərbaycanlılarının Həmrəyliyi Günü və Yeni il münasibəti ilə təbrik edən Namiq Cəlilov, kollektivə yeni ildə müvəffəqiyyətlər arzulayıb.
© Bütün hüquqlar qorunur. Xəbərlərdən istifadə edərkən www.shao.az saytına istinad zəruridir.
