Azərbaycan Milli Elmlər Akademiyası (AMEA) Mərkəzi Elmi Kitabxanasının (MEK) əməkdaşları AMEA N.Tusi adına Şamaxı Astrofizika Rəsədxanasının (ŞAR) Elmi Kitabxanasının fəaliyyətinin cari vəziyyəti ilə tanış olmaq üçün rəsədxananı ziyarət ediblər.

Tədbir zamanı rəsədxananın elmi katibi, astronomiya üzrə fəlsəfə doktoru, dosent Orxan Xəlilov  ŞAR  rəhbərliyi  adından qonaqları salamlayaraq MEK əməkdaşlarına rəsədxana haqqında məlumat verib.

Daha sonra MEK-in icraçı direktoru, filologiya üzrə fəlsəfə doktoru, dosent  Şəhla Tahirqızı, Beynəlxalq əlaqələr şöbəsinin müdiri Mübariz Göyüşlü, Komplektləşdirmə şöbəsinin müdiri Gülnar Məmmədova, Qarabağ müharibəsi qəhrəmanları fondunun müdiri Röksanə Səfərzadə, Xidmət şöbəsinin müdiri Ofelya Yunusova Mərkəzi Elmi Kitabxananın çoxşaxəli fəaliyyəti, iş prinsipləri və sistemi, mövcud bazaları, fondları haqqında, eləcə də MEK-də həyata keçirilən yeniliklərlə bağlı həmkarlarına geniş məlumat veriblər. Eyni zamanda, Rəsədxana kitabxanasının iş rejimi və fəaliyyəti, kitabxananın tarixi, mövcud fondlarının tərkibi, texniki avadanlıqları ilə yaxından tanış olublar. MEK əməkdaşları Rəsədxana kitabxanasına ədəbiyyatın qəbulu, kataloq-kartateka sisteminin davamlı şəkildə işlənməsi, inventar kitabının yazılması, ədəbiyyatın qəbulundan sonra texniki işlənməsi məsələləri, həmçinin İRBİS proqramında elektron bazanın yaradılması ilə bağlı tövsiyələrini bölüşüblər.

Tədbirin sonunda MEK əməkdaşları tərəfindən ŞAR Elmi Kitabxanasına Misir Mərdanovun Prezident İlham Əliyevin 60 illiyinə həsr edilmiş “Zəfərə aparan yol kitabı” təqdim olunub.

© Bütün hüquqlar qorunur. Xəbərlərdən istifadə edərkən www.shao.az saytına istinad zəruridir.