12 dekabr 2021-ci il tarixində AMEA  N.Tusi adına Şamaxı Astrofizika Rəsədxanasının (ŞAR) əməkdaşları müasir Azərbaycan Respublikasının memarı, ölkəmizin tərəqqisində misilsiz xidmətləri olan siyasi xadim, Ulu Öndər Heydər Əliyevin vəfatının 18-ci ildönümü münasibətilə, Ümumilli Liderin Şamaxı şəhərindəki abidəsini ziyarət ediblər.

Şamaxı Astrofizika Rəsədxanasının rəhbərliyi və rəsədxana əməkdaşları dahi rəhbərin əziz xatirəsinə hörmət və ehtiram əlaməti olaraq Ulu Öndərin abidəsi önünə gül dəstələri qoyub və ruhu qarşısında baş əyiblər.

Ümummilli Lider zəngin fəaliyyətində digər sahələrlə yanaşı, elm və təhsilə  xüsusi diqqət və qayğı ilə yanaşıb. Ömrünü Azərbaycanın davamlı və hərtərəfli inkişafına, elmi potensialının yüksəldilməsinə həsr edən Ulu Öndər  gənclərin yüksəkixtisaslı kadr kimi yetişməsi, onların təhsilini xarici ölkələrin nüfuzlu elm və təhsil müəssisələrində davam etdirməsi üçün mühüm qərarlara imza atıb. Məhz Heydər Əliyevin təşəbbüsü ilə hər il yüzlərlə Azərbaycan gənci sovet respublikalarının müxtəlif şəhərlərinə ali təhsil almağa göndərilmişdir. Bir neçə il sonra isə həmin gənclər ən vacib sahələri əhatə edən ixtisaslar üzrə təhsil alaraq respublikamıza təcrübəli mütəxəssis kimi qayıtmışlar. 

Heydər Əliyevin ölkəmizə rəhbərlik etdiyi bütün dövrlərdə qabaqcıl texnologiyanın Azərbaycana gətirilməsi, əldə olunan uğurlu elmi nəticələrin istehsalata tətbiqi, böyük alim ordusunun formalaşması prioritetə çevrilib.  Həmin illərdən başlayaraq Ulu Öndərin uğurla həyata keçirdiyi siyasətin təməlində hər zaman Azərbaycanın gələcəyi, milli dövlətçilik düşüncəsi dayanıb. Xalqımızın milli sərvəti adlandırdığı Elmlər Akademiyasının təkmilləşdirilməsi və yüksəlişi də məhz Heydər Əliyevin adı ilə bağlıdır. Azərbaycanın elm ocağı 70-ci illərdən başlayaraq dünyada böyük şöhrət qazanmış, özünün kadr potensialını yaratmış və maddi-texniki bazasını təkmilləşdirmişdir. Heydər Əliyev 1974-cü ildə AMEA Nəsirəddin Tusi adına Şamaxı Astrofizika Rəsədxanasına gələrək alimlərlə görüşmüşdür. Sonrakı dövrlərdə də Ulu Öndər daim rəsədxananın fəaliyyətini diqqət mərkəzində saxlamış, ölkəmizdə astrofizika elminin inkişafına yönələn qərarlara imza atmışdır.

Ulu öndər Heydər Əliyevin müdrikliklə müəyyən etdiyi və həyata keçirdiyi elm siyasəti bu gün ölkə Prezidenti İlham Əliyev tərəfindən uğurla davam etdirilir. Dövlət başçısı tərəfindən elmin inkişafına göstərilən diqqət və qayğı elmi potensialın güclənməsinə, yüksəksəviyyəli kadr potensialının  formalaşmasına,  gənc alim və mütəxəssislərin beynəlxalq miqyasda ölkəmizi təmsil etməsinə, dünya elminə töhfə verməsinə xidmət edir.

Ömrünü xalqımızın, dövlətimizin tərəqqisinə həsr edən Heydər Əliyevin xatirəsi daim qəlblərdə yaşayacaqdır.

© Bütün hüquqlar qorunur. Xəbərlərdən istifadə edərkən www.shao.az saytına istinad zəruridir.