8 dekabr 2021-ci il tarixində AMEA N.Tusi adına Şamaxı Astrofizika Rəsədxanasının (ŞAR) aparıcı alimləri, NASA-ın eksperti, “Şərq-Qərb” elmi mərkəzinin direktoru, ABŞ Merliend Universitetinin professoru, akademik Roald Saqdeev və Astronomiya tədqiqatları mərkəzinin (Bernardo universiteti, Santyaqo, Çili) direktoru prof. Elena Popova arasında onlayn elmi görüş keçirilib.
Görüşün əsas məqsədi astrofiziki tədqiqatların müasir inkişaf trendinə uyğun birgə elmi maraqların aydınlaşdırılması, gələcək elmi koopersiyaların yaradılması və kadr hazırlığı məsələlərindən ibarət olub.
Onlayn görüşü ŞAR-ın baş direktoru, AMEA-ın müxbir üzvü Namiq Cəlilov açaraq hazırda nəzəri və eksperimental sahələr üzrə rəsədxanada aparılan elmi tədqiqatlar haqqında ətraflı məlumat verib.
Sonra ŞAR-ın icraçı direktoru prof. N.İsmayılov görüş iştirakçılarına ŞAR-ın teleskopları, işıq qəbulediciləri və astroiqlimi barədə danışıb. Alim həmçinin rəsədxananın qoşulduğu Beynəlxaql elmi layihələr (GAİA, Grandma, HORİZON 2020) barəsində məlumat verib.
Daha sonra prof. Elena Popova Çilidə müasir astronomik tədqiqatlar üçün mövcud imkanları şərh edib. O, bildirib ki, beynəlxalq əməkdaşlıq çərçivəsində birgə astrofiziki tədqiqatların aparılması elmi inkişafa təkan verən başlıca amildir. Bu cür elmi əməkdaşlıqların yaradılmasında isə ilkin olaraq birgə maraq doğuran və aktual sahələrin müəyyənləşdirilməsi vacibdir.
Akademik Roald Saqdeev də öz növbəsində elmi əməkdaşlığın əhəmiyyətini xüsusi vurğulayaraq birgə koopersiyaya Pulkovo rəsədxanasının da cəlb olunmasını təklif edib.
Beynəlxaq elmi əməkdaşlıq görüşünün sonunda əməkdaşlığın aspektlərinin konkretləşdirilməsi və növbəti görüşə Pulkovo rəsədxanasının əməkdaşlarının da cəlb olunması qərara alınıb.
© Bütün hüquqlar qorunur. Xəbərlərdən istifadə edərkən www.shao.az saytına istinad zəruridir.
