Noyabrın 1-də AMEA N.Tusi adına Şamaxı Astrofizika Rəsədxanasının Bakı bölməsində "Ae/Be Herbiq tipli HD 179218 ulduzunda spektral dəyişmələr" mövzusunda astroseminar keçirilib.

Tədbiri giriş sözü ilə açan Şamaxı Astrofizika Rəsədxanasının direktoru, AMEA-nın müxbir üzvü Namiq Cəlilov seminar haqqında ümumi məlumat verib.

Sonra rəsədxananın “Qalaktikalar və ulduzəmələgəlmə prosesləri”şöbəsinin müdiri, fizika-riyaziyyat üzrə elmlər doktoru, professor Nəriman İsmayılov "Ae/Be Herbiq tipli HD 179218 ulduzunda spektral dəyişmələr" (N.Z.İsmayılov, Ü.Z.Bəşirova, H.N.Adıgözəlzadə) mövzusunda məruzə ilə çıxış edib.

Alim qeyd edib ki, HD179218 ulduzunun spektrində Hα xəttinin parametrlərinin iki dalğa şəklində 40 günlük xarakterik vaxtla dəyişməsi aşkar olunub. Birinci dalğa dərin və aydın ifadə olunur, ikinci isə nisbətən zəif ifadə olunur və fluktuasiyalarla təhrif olunur.

Alim bildirib ki, Hα xəttinin şüalanma komponentinin ekvivalent enini düzgün hesablamaq üçün onun qanadları normal hesab edilərək xüsusi qaydada continuum qurulub və şüalanma komponentinin təmiz ekvivalent eni EW hesablanıb. Bu kəmiyyət 90 günlük müşahidə dövrü ərzində təxminən 35-40 günlük iki dalğavari azalma və qayıtma dövrü göstərir. EW-nin qiymətləri 5-12 Å aralığında dəyişir: “Bizim nəticələrə görə D NaI xətləri invers P-Cyg profil göstərir. Krım müşahidələrinə görə isə bu xətlər 1999-cu ildə düz P Cyg  profil göstərir. Bu xətlərdə həm maddə axını, həm də akkresiyası müşahidə olunur”.

Məruzə tədbir iştirakçıları tərəfindən maraqla qarşılanıb, mövzu ətrafında müzakirələr aparılıb, suallar cavablandırılıb.

© Bütün hüquqlar qorunur. Xəbərlərdən istifadə edərkən www.shao.az saytına istinad zəruridir.