Oktyabrın 27-də AMEA N.Tusi adına Şamaxı Astrofizika Rəsədxanasında (ŞAR) növbəti onlayn astroseminar keçirilib.

Seminara rəhbərlik edən fizika riyaziyyat üzrə elmlər doktoru, müxbir üzv Namiq Cəlilov tədbiri giriş sözü ilə açaraq iştirakçıları salamlayıb və onlara məruzənin mövzusu haqqında məlumat verib.

Sonra rəsədxananın icraçı direktoru, f.r.e.d., professor Nəriman İsmayılov "Ulduzların spektral enerji paylanması.  I Tətbiq olunan metod” (N.Z. İsmayılov, A.F. Xoltigin, İ.İ. Romanyuk, M.A. Poqodin, A.V. Moiseva, Ü.S. Vəliev, S.A. Alışov, F. Hüseynova) mövzusunda məruzə ilə çıxış edib.

Təqdim olunan işdə optik və infraqırmızı diapazon üçün arxiv materiallarından istifadə edərək kosmik obyektlərin spektral enerji paylanma (SEP) əyrilərini qurmaq metodu haqqında məlumat şərh olunub, bir sıra standart və dəyişən obyektlərin 0.36-100 mkm diapazonda SEP əyrilərinin qurulmasının nəticələri verilib. Göstərilib ki, standart ulduzların sınaq üçün qurulmuş əyriləri metodun düzgün işlədiyini təsdiq edir. Məruzəçi bildirib ki, bu metod bir sıra müxtəlif yaşlı ulduzların və qalaktikaların ətrafında qaz-toz nisbətinin qiymətləndirilməsi üçün istifadə olunacaqdır.

Seminar iştirakçıları tərəfindən maraqla qarşılanan məruzənin sonunda mövzu ətrafında müzakirələr aparılıb və suallar cavablandırılıb.

© Bütün hüquqlar qorunur. Xəbərlərdən istifadə edərkən www.shao.az saytına istinad zəruridir.