4 oktyabr 2021-ci il tarixindəAMEA N.Tusi adına Şamaxı Astrofizika Rəsədxanasında “Günəş sistemi cisimlərinin fizika və dinamikasının tədqiqində müasir istiqamətlər” adlı beynəlxalq konfrans öz işinə başlayıb. Görkəmli astronom alim, rəsədxananın qurucusu akademik Hacıbəy Sultanovun 100 illik yubileyinə həsr olunmuş beynəlxalq konfransda Rusiya, Ukrayna, Gürcüstan, Slovakiya, Qazaxıstan, Tacikistan olan astronom alimlər iştirak edirlər.
Tədbiri Şamaxı Astrofizika Rəsədxanasının baş direktoru, müxbir üzv Namiq Cəlilov açaraq konfrans iştirakçılarını AMEA rəhbərliyi və fizika-riyaziyyat bölməsi adından salamlayıb və akademik Hacıbəy Sultanovun həyat və elmi yaradıcılığı haqqında onlara geniş məlumat verib. Bildirib ki, H.Sultanov 1953-cü ildən Azərbaycanda astronomik rəsədxananın tikintisinə rəhbərlik etmiş, ŞAR-ın rəsmi yaradıldığı vaxtdan (1959-cu il) 1981-ci ilədək rəsədxananın direktoru olmuşdur. O, 1976-1981-illər ərzində Azərbaycan Milli Elmlər Akademiyasının vitse-prezidenti olmuş, 1981-2007-ci illər ərzində ŞAR-da "Kiçik cisimlərin tədqiqi" şöbəsinə rəhbərlik etmişdir. H.F.Sultanov Azərbaycan EA-nın həqiqi və Beynəlxalq Astronomiya İttifaqının üzvü olmuşdur. O, Sovet İttifaqının və Azərbaycan Respublikasının bir sıra dövlət mükafatları ilə təltif olunmuşdur.
Sonra çıxış üçün söz AMEA Geologiya və Geofizika İnstitutunun baş direktoru, akademik Akif Əlizadəyə verilib. Hacıbəy Sultaovla əməkdaşlıqdan ziyadə, möhkəm dostluq münasibəti olan Akif Əlizadə görkəmli alimlə birgə xatirələrini konfrans iştirakçıları ilə bölüşüb, onun peşəkar işgüzar intizamından və gözəl insani keyfiyyətlərindən danışıb.
Daha sonra tədbirdə H.Sultanovun qızı Gülnar Sultanova çıxış edib. O, öz çıxışına tədbir təşkilatçılarına təşəkkür edərək başlayıb. G.Sultanova atasının elmə, astronomiyaya olan şövqündən danışıb, Hacıbəy Sultanovun Azərbaycanda açdığı astronomiya cığırından gedərək hal-hazırda görkəmli astronomların çalışdığı Şamaxı Astrofizika Rəsədxanasının kollektivinə gələcək elmi fəaliyyətində uğurlar arzulayıb.
Onlayn formada təşkil olunmuş beynəlxalq konfransda tanınmış rəssam Hüseyn Mirtəqəvi də çıxış edərək, yubiley münasibəti ilə akademik H.Sultanovun ailə üzvlərini, həmçinin bütün astronomları təbrik edib. Sonra isə H.Sultanovun faner üzərində cərrah bıçağı ilə çəkilmiş portretini konfrans iştirakçılarına təqdim edib. Portretin üzrəindəki müxtəlif əlavə təsvirlərin açıqlamasını verən rəssam, öz əl işini rəsədxananın muzeyinə bağışlayıb.
Konfransda həmçinin Azərbaycan Respublikasının Prezidenti Yanında Dövlət İdarəçilik Akademiyasının rektoru akademik Urxan Ələkbərov və Tacikistan Astrofizika institutunun direktoru Gülçöhrə Koxirovanın təbrik videoları izlənilib.
Memorial hissənin sonunda akademik Hacıbəy Sultanov haqqında sənədli film nümayiş etdirilib.
Qeyd edək ki, hal-hazırda elmi məruzələr fonunda davam etdirilən beyəlxalq konfrans öz işini 5 oktyabrda başa vuracaq.
© Bütün hüquqlar qorunur. Xəbərlərdən istifadə edərkən www.shao.az saytına istinad zəruridir.
