AMEA N.Tusi adına Şamaxı Astrofizika Rəsədxanasında (ŞAR) növbəti onlayn astroseminar keçirilib.

Seminara rəhbərlik edən fizika riyaziyyat üzrə fəlsəfə doktoru, dosent Məhəmməd Nurməmmədov tədbiri giriş sözü ilə açaraq iştirakçıları salamlayıb və onlara məruzənin mövzusu haqqında məlumat verib.

Daha sonra Şamaxı Astrofizika Rəsədxanasının "Nəzəri astrofizika və kosmologiya" şöbəsinin aparıcı elmi işçisi, fizika-riyaziyyat üzrə fəlsəfə doktoru, dosent Bala Əli rəcəbov “Kosmologiya, kvant-mexaniki hərəkət qrupları və elementar zərrəciklərin identifikasiyası” mövzusunda məruzə ilə çıxış edib.

Məruzəçi öz çıxışında, kosmoloji hərəkət qrupları və kvant-mexaniki qrupları arasında əlaqələri göstərib və bu qrupların təsvirlərinin elementar zərrəciklərin identifikasiyasındakı rolundan danışıb. İşdə maksimal-hərəkət qrupları adlanan Puankare, de Sitter və Qaliliey qruplarına xüsusi diqqət yetirilmişdir. Kütlənin relyativist və qeyri-relyativist fizikada müxtəlif statusda rol oynamasının fundamental səbəbləri analiz edilmişdir.

Seminarın sonunda kosmologiya və elementar zərrəciklər fizikası arasındakı əlaqələr, qravitasiya sahəsinin kvantlanması problemləri, qravitasiya dalğaları və qara dəliklərin rolu, qaranlıq materiya və enerji barədə geniş müzakirə aparılıb, suallar cavablandırılıb.

© Bütün hüquqlar qorunur. Xəbərlərdən istifadə edərkən www.shao.az saytına istinad zəruridir.