Amerikanın Milli Aeronavtika və Kosmos Agentliyi (NASA), Avropa Kosmik Agentliyi və Kanada Kosmik Agentliyi dünyanın kosmosdakı gözü sayılan Hubble teleskopunu əvəz edəcək yeni teleskop hazırlayıblar. Yeni teleskopa 1961-1968-ci illərdə NASA-ya rəhbərlik etmiş James Edwin Webbin adı verilib.
On milyard dollarlıq büdcəyə başa gətirilən kosmik teleskop son sınaqları da müvəffəqiyyətlə tamamlamasından sonra, buraxılış yerinə göndərilməyə hazırlaşır. Hazırda Amerikanın Kaliforniya ştatının Redondo (Redondo Beach) şəhərində saxlanılan James Webb teleskopu dekabr ayının 18-də Fransa Qvianasındakı kosmodromdan “Ariane 5” raketi vasitəsilə kosmosa buraxılacaq.
Yerdən təxminən 1,6 milyon km uzaqlıqda yerləşən “Laqranj” nöqtəsinə göndəriləcək bu yeni teleskop, kosmosda orbital infraqırmızı rəsədxana rolunu oynayacaq. Alimlərin fikrincə daha geniş dalğa uzunluğuna və yüksək həssaslığa malik olan Webb teleskopu Hubble Kosmik Teleskopunun tədqiqatlarını tamamlayacaq və daha da genişləndirəcək.
Webb teleskopunun inqilabi texnologiyası, kosmos tarixinin hər mərhələsini - Günəş sistemimizdən başlayaraq, ulduzların və planet sistemlərinin formalaşdığı toz buludlarının içərisini, kainatdakı ən uzaq qalaktikaları müşahidə edərək yeni və gözlənilməz kəşfləri ortaya qoyacaq və bəşəriyyətə kainatın mənşəyini və bizim oradakı yerimizi anlamağa kömək edəcək.
© Bütün hüquqlar qorunur. Xəbərlərdən istifadə edərkən www.shao.az saytına istinad zəruridir.
