AMEA N.Tusi adına Şamaxı Astrofizika Rəsədxanasında (ŞAR) növbəti onlayn astroseminar keçirilib.
Seminara rəhbərlik edən professor Nəriman İsmayılov tədbiri giriş sözü ilə açaraq iştirakçıları salamlayıb və onlara məruzənin mövzusu haqqında məlumat verib.
Daha sonra Şamaxı Astrofizika Rəsədxanasının "Ulduz atmosferləri fizikası və maqnetizm" şöbəsinin aparıcı elmi işçisi, fizika-riyaziyyat üzrə fəlsəfə doktoru, dosent Sabir Əliyev “Qoca ulduz topasının 17 və 21 Com maqnit ulduzlarının kompleks tədqiqi” mövzusunda məruzə ilə çıxış edib.
Məruzəçi, 17 və 21 Com maqnit ulduzlarının pekulyarlıq xüsusiyyətlərindən danışıb. O, qeyd edib ki, aparılan kompleks tədqiqatlarda bu qoca ulduzların fiziki parametrlərinin təkamül prosesində hansı formada dəyişməsinin cavan ulduzlarla müqayisəsi aparılıb. Tədqiqatlardan alınan nəticəyə görə təkamül nəticəsində qoca ulduzların maqnit sahəsi azalır və bu ulduzlarda baş ardıcıllığa yenicə daxil olmuş cavan ulduzlarla müqayisədə nadir torpaq elementlərinin xətləri bir qədər zəifləyir.
Seminar iştirakçıları tərəfindən maraqla qarşılanan məruzənin sonunda mövzu ətrafında geniş müzakirələr aparılıb, suallar cavablandırılıb.
© Bütün hüquqlar qorunur. Xəbərlərdən istifadə edərkən www.shao.az saytına istinad zəruridir.
