İyul ayının 29-dan etibarən rəsədxanada təşkil olunmuş “Yay Fest” fəaliyyətini növbəti düşərgə ilə davam etdirir. Avqustun 22-də “Yay Fest”in sonuncu düşərgəsi olan “İnkişaf və Karyera” kampı start götürüb.

Düşərgənin ilk günündə iştirakçılar Ulu Öndər Heydər Əliyevin Şamaxı şəhərinin mərkəzində ucaldılmış abidəsini ziyarət edərək, ümummilli liderin əziz xatirəsini yad ediblər.

Sonra Şamaxı Astrofizika Rəsədxanasının ərazisinə gələn iştirakçılara Gənclərin İnkişaf və Karyera Mərkəzinin fəaliyyəti ilə bağlı geniş məlumat verilib. Mərkəzin baş direktoru Rəvanə Həsənlinin “Azərbaycanda karyera inkişafı” mövzusunda çıxışı baş tutub.

Daha sonra düşərgə iştirakçılarının vaxtlarını xoş və səmərəli keçirmələri üçün müxtəlif əyləncəli fəaliyyətlər təşkil edilib və maraqlı oyunlar oynanılıb.

İki illik fasilədən sonra “Ulduzlara doğru” devizi ilə yenidən təşkil edilən edilən festivalda aşxam saatlarında gənclər üçün astro-seminar təşkil edilib. AMEA N.Tusi adına Şamaxı Astrofizika Rəsədxanasının (ŞAR) “Planetlər və kiçik səma cisimləri” şöbəsinin müdiri, fizika riyaziyyat üzrə fəlsəfə doktoru, dosent Ədalət Ətayi düşərgə iştirakçılarına astronomiyanın tarixi, rəsədxananın qurulması, ŞAR-da həyata keçirilən astronomik tədqiqatlar haqqında məlumat verib. Sonra isə Günəş sistemi planetləri, kosmik aparatlar və yerdənkənar sivilizasiyalar haqqında maraqlı məruzə ilə çıxış edib.

İştirakçılar tərəfindən böyük maraqla qarşılanan çıxışın yekununda əməkdaşımız Ə.Ətayi gəncləri maraqlandıran sualları ətraflı şəkildə cavablandırıb.

Nəzəri astro səyəhətdən sonra praktiki olaraq da kosmosa səyahət etmək istəyən festival iştirakçılarının bir qismi ŞAR-ın 70 santimetrlik teleskopu ilə Ayı və Saturnu müşahidə edib, səmadakı bürclər haqqında məlumatlandırılıblar.

© Bütün hüquqlar qorunur. Xəbərlərdən istifadə edərkən www.shao.az saytına istinad zəruridir.