Azərbaycan Respublikası Təhsil Nazirliyinin təşkilatçılığı ilə Şamaxı rayonunda orta məktəb şagirdləri üçün "Yay məktəbi" keçirilir.

Yay məktəbi çərçivəsində tədrislə yanaşı məktəblilərin muzeylərə, fərqli tarixi məkanlara, o cümlədən AMEA N.Tusi adına Şamaxı Astrofizika Rəsədxanasına (ŞAR) ekskursiyaları təşkil olunur.

ŞAR ekskursiyasında ilk öncə şagirdlərə rəsədxananın muzeyində olan ekspanatlar nümayiş etdirilir və hər bir ekspanat haqqında ətraflı məlumat verilir. Bundan başqa şagirdlər rəsədxananın teleskopları ilə də tanış edilir və teleskoplar, onların iş prinsipi, teleskopda aparılan elmi tədqiqat işlərinin nəticələri barədə məlumatlandırılırlar.

Qeyd edək ki, iyun ayının 16-dan etibarən başlayan "Yay məktəbi" ekskursiyaları 30 iyun tarixinədək davam edəcəkdir.

© Bütün hüquqlar qorunur. Xəbərlərdən istifadə edərkən www.shao.az saytına istinad zəruridir.