Hər bir xalqın tarixində yaşanan taleyüklü günlər sonralar onun gələcək həyatını müəyyən edən başlanğıcın əsasını qoyur. Bu mənada 15 İyun – Milli Qurtuluş Günü böyük tarixi əhəmiyyətə malikdir. Həmin tarixə qızıl hərflərlə imza atan isə Azərbaycanın müstəqilliyinin qorunub saxlanması, möhkəmlənməsi və inkişafında misilsiz xidmətləri olan dünya şöhrətli siyasi xadim Heydər Əliyevdir.
XX əsrin sonlarında yenidən müstəqillik qazanmaq fürsəti əldə edən Azərbaycan qısa vaxtdan sonra onun itirilməsi təhlükəsi ilə üzləşdi. 1993-cü ildə vətəndaş müharibəsi dərəcəsinə çatmış qarşıdurmalar birbaşa olaraq milli varlığımızı hədəfə almışdı. Belə çətin və mürəkkəb tarixi mərhələdə böyük coğrafi-strateji əhəmiyyətə, zəngin təbii sərvətlərə malik olan ölkənin tam müstəqil olması həm bəzi xarici dairələri, həm də hürriyətimizin əleyhinə olan daxildəki bir sıra qüvvələri qane etmirdi. Torpaqlarımızın Ermənistan silahlı qüvvələri tərəfindən davamlı işğalı, getdikcə gərginləşən siyasi vəziyyət, əhalinin acınacaqlı sosial durumu ölkəni bu bəlalardan xilas edə biləcək liderə ehtiyac olduğunu şərtləndirirdi. Məhz həmin vaxt müstəqilliyini yenicə bərpa etmiş ölkəmizi düşdüyü ağır və dözülməz vəziyyətdən Ulu Öndər çıxardı. O, 1993-cü ilin iyununda xalqın çağırışına səs verərək Bakıya qayıtdı. Onun müdrik siyasəti nəticəsində Azərbaycan müstəqil, demokratik, hüquqi və dünyəvi dövlət kimi inkişaf etməyə başladı. Mövcud problemlər mərhələlərlə həll olundu, əmin-amanlıq, siyasi sabitlik hökm sürdü. İctimai-siyasi, sosial-iqtisadi, elmi və mədəni həyatda əsaslı dönüş yarandı, xalqımızın bütövlüyü, həmrəyliyi, milli birliyi təmin edildi.
Heydər Əliyevin həyata keçirdiyi sosial-iqtisadi, siyasi tədbirlər nəticəsində Azərbaycanın milli mənafeyini qorumağa qadir olduğunu 44 günlük müharibədə sübut edən Milli Ordumuz formalaşdı, torpaqlarımızın müdafiəsi ilə bağlı mühüm addımlar atıldı. Respublikamız “Əsrin müqaviləsi”, qədim İpək Yolunun bərpası, Bakı-Tbilisi-Ceyhan, Bakı-Tbilisi-Ərzurum neft və qaz xətlərinin çəkilişi kimi qlobal layihələrin təşəbbüskarına və fəal iştirakçısına çevrildi. Ölkədə daha genişmiqyaslı islahatların aparılması üçün normativ-hüquqi bazanın formalaşdırılmasına başlanıldı. Bir sözlə, Ümummilli liderin qətiyyəti xalqa ruh yüksəkliyi gətirdi, inamımızı özümüzə qaytardı.
Görkəmli dövlət xadimi Heydər Əliyev müstəqilliyimizin memarı və qurucusudur. İti zəka, müdriklik, uzaqgörənlik və əzmkarlıq ona Ümummilli lider mövqeyi qazandırıb. Hazırda Prezident İlham Əliyevin rəhbərliyi ilə Azərbaycan dinamik inkişaf edən, modernləşən, beynəlxalq miqyasda nüfuzu gündən-günə artan dövlətə çevrilib, ötən dövr ərzində möhtəşəm iqtisadi uğurlara imza atılıb. Azərbaycana gələn hər bir şəxs ölkəmizdə gedən inkişafa heyran qalır. Bu gün xalqımız əmindir ki, müstəqil Azərbaycan Heydər Əliyev ideyaları işığında Prezident İlham Əliyevin rəhbərliyi ilə yüksək zirvələri fəth edəcək.
1997-ci ildən etibarən parlamentin qərarı ilə rəsmi bayram kimi qeyd edilən 15 İyun - Milli Qurtuluş Günü münasibətilə AMEA Nəsirəddin Tusi adına Şamaxı Astorfizika Rəsədxanasının rəhbərliyi və kollektivi adından bütün xalqımızı, ölkə vətəndaşlarını təbrik edir, sülh və əmin-amanlıq arzulayırıq.
© Bütün hüquqlar qorunur. Xəbərlərdən istifadə edərkən www.shao.az saytına istinad zəruridir.
