Faiq Adil oğlu Musayev 19 avqust 1959-cu ildə Azərbaycan Respublikasının Quba rayonunda anadan olmuşdur. O, 1981 –cı ildə Azərbaycan Dövlət Universitetinin (Bakı Dövlət Universiteti) fizika fakültəsini bitirmiş və gənc mütəxəssis kimi Kosmik Tədqiqatlar İnstitutunda əmək fəaliyyətinə başlamışdır.
1982-ci ildən AMEA Şamaxı Astrofizika Rəsədxanasında elmi işçi vəzifəsinə işə qəbul edilmişdir.
1992-ci ildə Faiq Musayev Rusiya Elmlər Akademiyasının Xüsusi Astrofizika Rəsədxanasında dissertasiya işini uğurla müdafiə edərək fizika-riyaziyyat elmləri namizədi elmi dərəcəsini almışdır.
1995-ci ildən öz xahişi ilə Şamaxı Astrofizika Rəsədxanasından işdən çıxmış və həmin ildən dünyanın ən məşhur astrofizika mərkəzlərindən biri olan Rusiya Elmlər Akademiyasının Xüsusi Astrofizika Rəsədxanasında elmi fəaliyyətini davam etdirmişdir. O, uzun illər orada çalışmış və teleskoplar üçün spesifik elektron işıqqəbuledicilərinin yığılması ilə bağlı böyük təcrübə qazanmışdır. Optik cihazların yığılmasında yüksəkkvalifikasiyalı eksperimentator-spektroskopist kimi özünü təsdiq etmişdir. Son illərdə onun Rusiya, Polşa, Bolqarıstan kimi ölkələrin Rəsədxanalarındakı teleskoplar üçün yığdığı cihazlar böyük müvəffəqiyətlə sınaqdan keçmiş və özünü doğrultmuşdur. Onun hazırladığı cihazlarda alınmış yüksəkkeyfiyyətli müşahidə materialları əsasında müxtəlif müəlliflər tərəfindən maraqlı nəticələr alınmışdır.
Faiq Musayevin Şamaxı Astrofizika Rəsədxanası ilə REA Xüsusi Astrofizika Rəsədxanası arasında əlaqələrin genişləndirilməsində, Rəsədxana teleskoplarında qurulan optik cihazların hazırlanmasında xüsusi xidmətləri olmuşdur.
İşlədiyi müddət ərzində dünyanın aparıcı jurnallarında 150-dən çox elmi məqaləsi çapdan çıxmışdır.
01 iyun 2021-ci il tarixdə Faiq Adil oğlu Musayev gözlənilmədən vəfat etmişdir. AMEA Şamaxı Astrofizika Rəsədxanasının kollektivi, həmyerlimiz, Rusiya Elmlər Akademiyasının Xüsusi Astrofizika Rəsədxanasının aparıcı elmi işçisi, fizika-riyaziyyat elmləri namizədi Faiq Adil oğlu Musayevin vəfatından kədərləndiklərini bildirir və ailə üzvlərinə dərin hüznlə başsağlığı verir.
Faiq Musayevin xatirəsi onu sevənlərin qəlbində daima yaşayacaqdır.
Allah rəhmət eləsin!
© Bütün hüquqlar qorunur. Xəbərlərdən istifadə edərkən www.shao.az saytına istinad zəruridir.
