1991-ci ildə öz müstəqilliyini bərpa edən ölkəmiz 1918-1920-ci illərdə iyirmi üç ay ərzində mövcud olan və müsəlman şərqində ilk dünyəvi, demokratik dövlət kimi tarixə düşən Azərbaycan Xalq Cümhuriyyətinin (AXC) hüquqi varisidir. Hələ o dövrdə AXC qədim ənənələrimizi yaşadaraq dövlət təsisatlarının yaradılmasına nail olmuş, çox mürəkkəb ictimai-siyasi şəraitdə fəaliyyət göstərərək mütərəqqi hadisələrə imza atmışdır. 1918-ci ildə İstiqlal Bəyannaməsinin elan edildiyi 28 may tarixi 1990-cı ildən etibarən ölkəmizdə Respublika Günü kimi qeyd olunur. Bu əlamətdar gündə Məhəmməd Əmin Rəsulzadə, Fətəli Xan Xoyski, Əlimərdan bəy Topçubaşov, Nəsib bəy Yusifbəyli və xalq cümhuriyyəti hökumətinin bütün üzvlərinin əziz xatirəsi minnətdarlıq hissi ilə xatırlanır, dərin ehtiramla anılır.
AXC-nin süqutundan sonrakı dövrlərdə Azərbaycan Sovetlər İttifaqının tərkibində respublika olaraq böyük inkişaf yolu keçdi. Bütün fəaliyyət sahələrində, xüsusən də elmdə dünya əhəmiyyətli nailiyyətlərə imza atıldı, ölkəmizin elm məbədi olan Azərbaycan Elmlər Akademiyası yaradıldı. Dünyaşöhrətli alimlərimizin rəhbərliyi ilə fundamental elmi məktəblər formalaşmağa başladı. Hazırda həmin məktəblərin yetirmələri ölkəmizin hərtərəfli inkişafında öz töhfələrini verməkdədirlər.
Müstəqilliyini yenidən bərpa edən Azərbaycanı siyasi və iqtisadi böhrandan çıxaran Ümummilli lider Heydər Əliyevin rəhbərliyi ilə 1993-cü ildən etibarən ölkəmizdə daxili ictimai-siyasi sabitlik möhkəmlənməyə başladı. İqtisadi, hərbi və digər sahələrdə hərtərəfli inkişafa nail olan respublikamızın beynəlxalq aləmdə nüfuzu əhəmiyyətli dərəcədə artdı. Bir çox aparıcı ölkələrlə iqtisadi əlaqələr quruldu, Azərbaycan Dövlət Neft Şirkəti ilə nüfuzlu şirkətlər arasında birinci neft müqaviləsi imzalandı. “Əsrin müqaviləsi” Azərbaycan iqtisadiyyatının inkişafına geniş imkanlar yaratdı. Uğurlu xarici siyasət aparıldı, müxtəlif ölkələrlə qarşılıqlı faydalı əlaqələr qurularaq inkişaf etdirildi.
Bu gün beynəlxalq təşkilatlarda uğurla təmsil olunan Azərbaycan artıq dünya birliyində öz layiqli yerini tutaraq nəhəng layihələrə imza atmaqda davam edir. Azərbaycanın Silahlı Qüvvələri, Milli Ordusu müstəqilliyimizin, dövlətçiliyimizin keşiyində duraraq torpaqlarımızı qoruyur. Bu gün böyük qürur və fəxarət hissi ilə deyə bilərik ki, Azərbaycanın dövlət müstəqilliyi gündən-günə möhkəmlənməklə yanaşı, sarsılmaz siyasi iradəsini dünyaya nümayiş etdirən Respublika Prezidenti, Ali Baş Komandan İlham Əliyevin rəhbərliyi ilə ordumuzun rəşadəti nəticəsində ərazi bütövlüyümüz təmin olunur. Ötən il aparılan 44 günlük Vətən müharibəsində qazanılan möhtəşəm qələbə indi ölkəmizin müstəqillik bayramını ikiqat sevinclə qeyd etməyə əsas verir.
Azərbaycanın dövlətçiliyi, müstəqilliyi əbədidir, sarsılmazdır! Tariximizin ən şanlı və parlaq səhifələrindən biri olan 28 May - Respublika Günü münasibətilə xalqımızı, bütün ölkə vətəndaşlarını təbrik edir, sülh və əmin-amanlıq arzulayırıq, şəhidlərimizə rəhmət, qazilərimizə şəfa diləyirik.
© Bütün hüquqlar qorunur. Xəbərlərdən istifadə edərkən www.shao.az saytına istinad zəruridir.
