Mayın ayının 20-də AMEA N.Tusi adına Şamaxı Astrofizika Rəsədxanasında (ŞAR) növbəti astroseminar keçirilib. 

Seminara rəhbərlik edən f.-r.ü.f.d, dosent Bayram Rüstəmov seminarı giriş sözü ilə açaraq, tədbir iştirakçılarına məruzənin mövzusu haqqında məlumat verib.

Sonra rəsədxananın “Planetlər və kiçik səma cisimləri” şöbəsinin böyük elmi işçisi a.ü.f.d Ülviyyə Poladova "Komet parıltılarında meteor sellərinin mümkün rolu" mövzusunda məruzəsini seminar iştirakçılarına təqdim edib.

Məruzəçi komet parıltılarının baş vermə səbəbi kimi meteor selləri ilə toqquşma mexanizminin araşdırılırmasından bəhs edib. O, bildirib ki, işdə kometlərin məlum olan meteor sellərindən keçməsi nəzərdən keçirilib. Müşahidə obyekti olaraq parıltı qeydə alınan 116 komet və 102 meteor seli götürülüb. Xüsusi olaraq komet parıltıları üçün zərbə mexanizminin yoxlanılması və dəqiqləşdirilməsi məqsədi ilə bu işdə həmçinın komet və meteor orbitlərinin MOİD (kometin və meteor selinin orbitləri arasındakı ən qısa məsafə) analizinin nəticələrinə də baxılıb. Parlaqlıq əyrilərində tez-tez parıltılar baş verən  17P (Holms) dövrü  kometi haqqında  da məlumat verilib. Məruzəçi, meteor sellərinin konkret keçmə anlarını bilməklə bu yanaşma vasitəsilə komet parıltısının əvvəlcədən proqnozlaşdırıla bilməsi və parıltıların proqnozunu verərkən ∆ (selə qədər heliosentrik məsafə ilə  selə nəzərən komet orbitinin düyün məsafəsi arasındakı fərq) parametrinin daha praktik əhəmiyyət kəsb etdiyini bildirib.

Sonda məruzənin mövzusu haqqında geniş müzakirələr aparılıb və iştirakçıları maraqlandıran suallar cavablandırılıb.

Qeyd edək ki, COVID-19 pandemiyası ilə əlaqədar, Respublika ərazisində tətbiq edilən karantin qaydalarına uyğun olaraq, seminar “Zoom” proqramı  vasitəsilə onlayn şəkildə keçirilib.

© Bütün hüquqlar qorunur. Xəbərlərdən istifadə edərkən www.shao.az saytına istinad zəruridir.