May ayının 14-də Kral Astronomiya Cəmiyətinin “Fotosferdən taca doğru MHD dalğaları” mövzusunda elmi diskusiyası keçirilib. Diskusiyada müxtəlif ölkələri təmsil edən astronom alimlər iştirak edib.

Onlayn formada təşkil edilən diskusiyada Günəş atmosferindəki fotosferdən Günəş tacına qədər olan maqnit-hidrodinamik (MHD) dalğaları ilə bağlı əldə olunan son elmi nəticələri özündə əks etdirən məruzələr təqdim edilib.

AMEA N.Tusi adına Şamaxı Astrofizika Rəsədxanasının fəlsəfə doktoru üzrə qiyabi doktorantı Rəcəb İsmayıllı da öz növbəsində “Sıxılmaz MHD-də uniturbulentlik xüsusiyyətləri” mövzusunda məruzə ilə çıxış edib. Məruzəçi qeyd edib ki, təqdim olunan işdə maqnit sahəsinə perpendikulyar qeyri-bircins sıxlıq profili nəzərə alınmış və maqnit sahəsi boyunca yayılan dalğaların turbulensiyası, enerji itkisi araşdırılmışdır. Səth Alfven dalğalarının sönmə zamanının riyazi modeli hesablanmış və ədədi simulayasiya hesablamaları ilə müqayisə edilmişdir. Nəticələr onu göstərir ki, eyni istiqamətdə yayılan dalğaların qeyri-xətti öz-kaskadı sönməsinin riyazi və ədədi hesablamalarının müqayisəsi üst-üstə düşür. Bu tip bir istiqamətli kaskadın mövcudluğu tac plazmasının istiləşməsində və Günəş küləyinin aktivləşməsində rol oynaya bilər.

Sonda təqdim olunan məruzələrin mövzuları ətrafında geniş müzakirələr aparılıb və suallar cavablandırılıb.

© Bütün hüquqlar qorunur. Xəbərlərdən istifadə edərkən www.shao.az saytına istinad zəruridir.