Quluzadə Cəfər Müseyib oğlu 27 avqust 1936-cı ildə Azərbaycanın Tovuz rayonunun Xatınlı kəndində anadan olmuşdur. O, 1961-ci ildə Leninqrad Dövlət Universitetini bitirmişdir. 1966-ci ildə Astrofizika ixtisası üzrə aspiranturanı bitirmiş və “Müxtəlif intensivlikli Fraunhofer xətlərinin konturları haqqında” mövzusunda dissertasiya işini müdafiə edərək fizika-riyaziyyat elmləri namizədi elmi dərəcəsini almışdır.

Cəfər Quluzadə 1966-1969-cu illərdə AMEA-nın Şamaxı Astrofizika Rəsədxanasında elmi işçi vəzifəsində çalışmışdır. 1969-cu ildən Bakı Dövlət Universitetində (BDU) dosent, 1991-ci ildən professor vəzifəsində işləmişdir. C.Quluzadə 2003-cü ildə “Günəşin ayırd olunmuş və ayırd olunmamış spektrində zəif və orta intensivlikli Fraunhofer xətlərinin profillərinin incə quruluşunun tədqiqi” mövzusunda doktorluq dissertasiyasını müdafiə etmişdir. 1991-ci ildə keçmiş SSRİ –nin Kosmonavtika Federasiyasının diplomuna layiq görülmüşdür. 1992-94-cü illərdə İstanbul Universitetində «Spektroskopiya» kursunun tədrisini təşkil etmişdir. 1997-2019-cu illərdə Bakı Dövlət Universitetində Astrofizika kafedrasının müdiri vəzifəsində,  2019-cu ildən isə həmin kafedrada məsləhətçi-professor vəzifəsində çalışmışdır. 2001-ci ildən Avropa Astronomiya Cəmiyyətinin üzvü olmuşdur. 2009-cu ildə Azərbaycan Respublikası Prezidentinin fərmanı ilə “əməkdar müəllim” adına layiq görülmüşdür.

Cəfər Quluzadə BDU-da işlədiyi müddətdə tələbələrə Astronomiya, Günəş fizikası, Atom spektroskopiyası, Astrofizika fənlərindən mühazirələr oxumuşdur. Onun Azərbaycanda astronomiya elminə gənc kadrların cəlb edilməsində müstəsna xidmətləri olmuşdur. Onun rəhbərliyi altında 6 nəfər elmlər namizədi, 2 nəfər elmlər doktoru elmi dərəcəsi almışlar. İşlədiyi müddət ərzində 230-dan çox elmi məqalənin, 14 kitab və 1 monoqrafiyanın müəllifi olmuşdur. Günəş fizikası sahəsində bir çox yeni tədqiqat üsulları təklif etmişdir.

Görkəmli astronom, Azərbaycanda astronomiya elminin inkişafında əvəzsis xidmətləri olmuş professor Quluzadə Cəfər Müseyib oğlu 14 aprel 2021-ci il tarixdə 85 yaşında vəfat etmişdir.

Allah rəhmət eləsin!

© Bütün hüquqlar qorunur. Xəbərlərdən istifadə edərkən www.shao.az saytına istinad zəruridir.