AMEA N.Tusi adına Şamaxı Astrofizika Rəsədxanasının “Planetlər və kiçik səma cisimləri” şöbəsinin aparıcı elmi işçisi Dmitriy İvanoviç Şestopalov 07 aprel 2021-ci il tarixində vəfat etmişdir. Acı pandemiya dövründə “COVİD-19” virusu astronom həmkarımız D.İ.Şestopalovdan yan keçmədi ,elmi işlərində sərraf olan ,daim çalışan zəhmətkeş bir insanı sıramızdan almaqla, acı həqiqət yaşatdı.
Dmitriy İvanoviç Şestopalov 1952-ci il 22 aprel tarixində Bakı şəhərində anadan olmuşdur. O, 1975-ci ildə Ukrayna Respublikası, Xarkov Dövlət Universitetinin fizika fakültəsini “Astronomiya” ixtisası üzrə bitirmişdir. Daha sonra həmin universitetdə astronomiya ixtisası üzrə aspiranturada təhsilini davam etdirmişdir. 1980-ci ildə Moskva Dövlət Universitetinin Şternberq adına Dövlət Astronomiya İnstitutunda Astrofizika ixtisası üzrə “Ay səthinin polyarimetrik və kolorimetrik xəritəsi” mövzusunda dissertasiyasını uğurla müdafiə edərək fizika-riyaziyyat elmləri namizədi alimlik dərəcəsi almışdır.
D.İ.Şestopalov 1978-ci ildən Şamaxı Astrofizika Rəsədxanasında kiçik elmi işçi vəzifəsində fəaliyyətə başlamışdır.1980-ci ildən başlayaraq ŞAR-da “Asteroidlərin fiziki xüsusiyyətlərinin tədqiqi ” ilə məşğul olur. Bu müddət ərzində asteroidlərin fiziki xassələrinin tədqiqinə həsr olunmuş 170-dən çox elmi işlərinin əksəriyyəti dünyanın sanballı jurnallarında dərc olunmuşdur. ŞAR teleskoplarında asteroidlərin spektral müşahidələrinin əsas təşkilatçısı və müşahidəçilərindən biri olmuşdur. Onun rəhbərliyi ilə skanedən spektrometrin avtomatlaşdırılması, həmin qurğu üçün informasiya-ölçmə kompleksi hazırlamışdır ki, bu da asteroidlərin spektral müşahidələrinin dəqiqliyini xeyli artırilmasına xidmət edirdi.. Sankt-Peterburq Universitetinin əməkdaşları ilə birgə kimyəvi tərkibinə görə asteroidlərə yaxın sayılan meteoritlərdən əks olunan şüalanma spektrlərinin tədqiqi proqramı təşkil olunmuş və dərin təhlillər aparılmışdır. Vesta asteroidinin, Mars planetinin və Halley kometinin Beynəlxalq kooperativ proqramları üzrə müşahidələrin ŞAR-dan cavabdeh icraçısı olmuşdur. ŞAR-da təşkil olunmuş “Asteroidlər fizikası” üzrə Beynəlxalq konfransın Təşkilat komitəsinin sədri seçilmişdir.
1983-cü ildən böyük elmi işçi, 1992-ci ildə dosent, 1994-cü ildən isə “Planetlər və səma cisimləri” şöbəsində aparıcı elmi işçi vəzifəsində işini davam etdirirdi..
1980-1992-ci illər ərzində “Asteroidlər”, “Kometlər” və “Spektrofotometriya və fotometrik standartlar və kataloqları” Beynəlxalq işçi qruplarının üzvü olmuşdur. ŞAR-da asteroidlərin uzunmüddətli tədqiqinə həsr olunmuş iki monoqrafiya , ŞAR tarixində əsas yer tutan “425 parlaq ulduz spektrlərində enerji paylanması” kitabın həmmüəlifi olmuşdur.
Xüsusilə qeyd edilməlidir ki, D.İ. Şestopalovun elmi fəaliyyəti beynəlxalq elmi əməkdaşlıq çərçivəsində həyata keçirilmişdir. O, Rusiya, Ukrayna, ABŞ, Fransa, Kanada, Yaponiya və s. ölkələrdən olan həmkarları ilə sıx elmi əlaqədə olmuş və birgə işlər yerinə yetirmişdir. Bir çox Beynəlxalq konfransların daimi iştirakçısı, 120-dən artıq beynəlxalq jurnal və elmi konfrans materiallarında dərc olunmuş məqalə və tezislərin müəllifi olmuşdur.
D.İ. Şestopalov bir neçə işçi qrupun üzvü, 2001-ci ildən isə Avropa Astronomiya Cəmiyyətinin və Amerika Geofizika Cəmiyyətinin üzvü olmuşdur.
Rəsədxananın elmi və ictimayi həyatında yaxından iştirak etmişdir. Allah rəhmət eləsin.
© Bütün hüquqlar qorunur. Xəbərlərdən istifadə edərkən www.shao.az saytına istinad zəruridir.
