Əziz və hörmətli xanımlar!

8 Mart bəşəriyyətin ülvi bir varlıq olan qadına bəslədiyi məhəbbət və ehtiramı parlaq ifadə etdirən bayram kimi dünyada geniş qeyd olunur. İnsan cəmiyyətinin mədəni inkişaf səviyyəsi və yüksəlişi qadına, anaya olan münasibət ilə sıx bağlıdır. Belə ki, qadınlar hər dövrdə dünyanın inkişaf istiqamətlərinin müəyyən edilməsində böyük xidmətlər göstərirlər.

Azərbaycan qadınları tarix boyu xalqımızın taleyində əhəmiyyətli rol oynamışlar. Azərbaycanın müdrik hökmdar, cəsur sərkərdə, elm-irfan nümayəndəsi, istedadlı şair və sənətkar qadınlarının və həmin qadınların yetişdirdiyi hökmdarlar, sərkərdələr, alimlər, şairlər və sənətkarların adları çoxəsrlik zəngin tariximizin səhifələrinə qızıl hərflərlə yazılmışdır. Xalqımızın təfəkküründə ən əziz, ən qiymətli bilinən Vətən, torpaq, dil anlayışlarının məhz ana adı ilə bağlı olması da qadına və ana adına verilən yüksək qiymətin əyani təzühürüdür.

Bu gün, 28 ildən sonra Ana Vətənimizin ərazi bütövlüyünün bərpa edilməsində, əzəli torpaqlarımızın işğaldan azad edilməsində də ən böyük pay sahibi məhz analarımızdır ki, Vətən üçün layiqli, cəsur və igid oğullar yetişdiriblər.

AMEA N.Tusi adına Şamaxı Astrofizika Rəsədxanasının (ŞAR) rəhbərliyi adından, rəsədxananın bütün qadın kollektivini və onların timsalında bütün Azərbaycan xanımlarını 8 Mart Beynəlxalq Qadınlar Günü münasibətilə təbrik edirik.

© Bütün hüquqlar qorunur. Xəbərlərdən istifadə edərkən www.shao.az saytına istinad zəruridir.