26-28 fevral 2021-ci il tarixlərində Türkiyənin  Kayseri Universitetinin təşkilatçılığı ilə “USBIK 2021 Beynəlxalq Elm Konfransı” keçirilib. Onlayn şəkildə təşkil olunmuş konfransa müxtəlif ölkələri təmsil edən alimlər qatılıb.

Konfransda AMEA N.Tusi adına Şamaxı Astrofizika Rəsədxanasının əməkdaşı, fizika riyaziyyat üzrə fəlsəfə doktoru Mirnamik Bəşirov da iştirak edib.

Beynəlxalq konfransın 3-cü günündə Mirnamik Bəşirov “Təkzərrəcikli toqquşmasız Günəş küləyi plazması üçün maqnithidrodinamik köçürmə tənliklərinin bəzi xüsusi həlləri” mövzusunda məruzə ilə çıxış edib.

Məruzə konfrans iştirakçıları tərəfindən maraqla qarşılanıb. Mövzu ətrafında geniş müzakirələr aparılıb və suallar cavablandırılıb.

Beynəlxalq konfransın yekununda konfrans iştirakçılarına sertifikatlar təqdim edilib.

Qeyd edək ki, konfransa təqdim edilmiş materiallar cari ilin ilk yarısında Kayseri Universiteti tərəfindən dərc ediləcəkdir.

© Bütün hüquqlar qorunur. Xəbərlərdən istifadə edərkən www.shao.az saytına istinad zəruridir.