Amerikanın Milli Aeronavtika və Kosmos Agentliyinin (NASA)  2020-ci ilin iyul ayında  Mars planetinə “Atlas V” raketi vasitəsilə göndərdiyi “Perseverance” aparatı 203 gün müddətində 470 milyon km məsafə qət etdikdən sonra qırmızı planetə eniş edib.

Kosmik aparatın Marsın səthinə enişi təxminən yeddi dəqiqə davam edib. Bu müddət ərzində bütün əməliyyatlar avtomatik olaraq həyata keçirilib. Enmə prosesinin bütün  çətinliklərinə baxmayaraq, Bakı vaxtilə saat 00:53-də mütəxəssislər xüsusi paraşütlər və reaktiv qurğu vasitəsilə 1026 kq ağırlığında olan “Perseverance” aparatının, planetin ~50 km enə malik Jezero krateri yaxınlığında səthə enişini uğurla həyata keçiriblər.

“Perseverance” aparatı vasitəsilə bir neçə il müddətində Mars planetində tədqiqat işləri aparılacaqdır. Tədqiqatlar əsasən Jezero krateri hövzəsini əhatə edəcək.

Aparat müxtəlif kameralar, mikrofonlar və digər elmi tədqiqatlar üçün nəzərdə tutulmuş cihazlarla təmin edilmişdir.

NASA-nın məlumatına əsasən, enişdən dərhal sonra aparat Marsdakı missiyasına başlayıb və ilk fotosunu çəkərək Yerdəki idarəetmə mərkəzinə göndərib.

Qeyd edək ki, aparatın qırmızı planetə enməsi NASA-nın saytında da canlı olaraq yayımlanıb.

© Bütün hüquqlar qorunur. Xəbərlərdən istifadə edərkən www.shao.az saytına istinad zəruridir.