Hər il iyun ayının 30-u Asteroid Fondu tərəfindən “Beynəlxalq Asteroid Günü” olaraq qeyd olunur. Asteroid günündə hər il müxtəlif mövzular ön plana çəkilərək ictimaiyyətin diqqətinə çatdırılır. “Beynəlxalq Asteroid Günü”nün bu ilki mövzusu NASA-nın NEAR-Shoemaker kosmik gəmisinin kosmosa buraxılışının 25-ci ildönümü və 2021-ci ildə NASA-nın Lucy, NEA Scout və DART adlı üç yeni asteroid missiyasının başladılması ilə dünyanın ilk asteroid defleksiya texnikasının sınaqdan keçirilməsi olacaq.
Asteroidlərin tədqiqinə həsr olunmuş ilk missiya olan Near Earth Asteroid Rendezvous (NEAR) - Shoemaker missiyasına Amerikanın Milli Aeronavtika və Kosmos İdarəsi (NASA) tərəfindən 1996-cı il 17 fevral tarixində start verilmişdir. Bu missiya, orbitə çıxan bütün gələcək asteroid missiyalarına yol açan ilk missiya olmuşdur.
Hazırda isə Asteroidlərlə bağlı missiyalar elm və texnologiyanın inkişafı nəticəsində yeni bir səviyyəyə daşınıb. Bu inkişafı tətikləyən əsas amil isə 15 fevral 2013-cü ildə Rusiya səmasını sarsıdan Çelyabinsk meteoridi olmuşdur. Məhz bu hadissə asteroidlərin zaman-zaman yerlə toqquşacağı barədə həyəcan təbili rolunu oynayaraq asteroid missiyalarının inkişaf etdirilməsini zəruri etmişdir. Beləliklə, Yeri mümkün asteroid toqquşmalarından qorumaq üçün NASA-nın Double Asteroid Redirection Test (DART) missiyası başladılır. Tədqqatçıların fikrincə, DART missiyası Dimorphos asteroidinə təsir edib onun orbitini əhəmiyyətli dərəcədə dəyişdirərək asteroid elmində və planetar müdafiədə yeni bir dövrün başlanğıcı olacaqdır. Daha sonra isə Avropa Kosmik Agentliyinin (ESA) Hera missiyası DART-ın Dimorphos üzərindəki təsirlərini araşdıracaq.
Qeyd edək ki, 2015-ci ildən bu yana 30 iyun tarixi bütün dünyada “Beynəlxalq Asteroid Günü” kimi qeyd edilir. Beynəlxalq gün üçün məhz bu günün seçilməsi heç də təsadüfi deyil. 1908-ci il iyunun 30-da məşhur Tunqus meteoriti Yerə (Sibirə) düşüb. Bu təşəbbüsün əsas məqsədi Yerə asteroidin düşməsi təhlükəsini ictimaiyyətə çatdırmaqdır.
© Bütün hüquqlar qorunur. Xəbərlərdən istifadə edərkən www.shao.az saytına istinad zəruridir.
