AMEA N.Tusi adına Şamaxı Astrofizika Rəsədxanasının (ŞAR) əməkdaşları professor Nəriman İsmayılov və onun yetirməsi elmi işçi Şəfəq İsmayılovanın həmmüəllifi olduğu elmi məqalə yüksək reytinqli elmi jurnalda dərc edilib.
Məqalə, Londonda Kral Astronomiya Cəmiyyətinin aylıq Astronomiya jurnalının (Impact Factor 5.5) 2021-ci il üçün (Volume 502, Issue 1, pp.157-175) buraxılışında nəşr edilib.
https://ui.adsabs.harvard.edu/abs/2021MNRAS.502..157I/abstract
Bu tədqiqatlar AMEA ŞAR-ın 2 m teleskopunda 2011-2015-ci illərdə HD199478 parlaq ifratnəhəng ulduzunun spektral müşahidələrində alınan spektral materiallar əsasında yerinə yetirilmişdir. Belə ulduzların atmosferində kvazi dövri dəyişmələr, döyünmələr və qeyri stasionar hadisələr müşahidə olunmaqdadır. Lakin hələlik bu cür fiziki dəyişmələrin mahiyyətini izah etmək mümkün olmamışdır.
Əməkdaşlarımızın məqaləsində ilk dəfə göstərilmişdir ki, HD199478 ulduzununu atmosferində baş verən dəyişmələrdə ulduz küləyi və maqnit sahəsinin rolu böyükdür. Atmosferin müxtəlif qatlarında yaranan incə udulma xətlərinin öyrənilməsi radial istiqamətdə döyünmələrin mövcud olmasını sübut etməyə imkan vermişdir. İşdə ilk dəfə belə dəyişmələrin xarakterik vaxtının 45-50 gün olduğu göstərilmişdir.
© Bütün hüquqlar qorunur. Xəbərlərdən istifadə edərkən www.shao.az saytına istinad zəruridir.
