AMEA N.Tusi adına Şamaxı Astrofizika Rəsədxanasının direktoru, AMEA-nın müxbir üzvü Namiq Cəlilov Azərbaycan Respublikası Səfərbərlik və Hərbi Xidmətə Çağırış üzrə Dövlət Xidmətinin Fəxri Fərmanı ilə təltif olunub.  

Alim bu mükafata Azərbaycan Respublikası Prezidenti cənab İlham Əliyevin “Azərbaycan Respublikasında qismən səfərbərlik elan edilməsi haqqında” müvafiq Sərəncamından irəli gələn vəzifələrin icrasında, eyni zamanda Vətən müharibəsi dövründə qələbənini əldə edilməsi naminə hərbi hissələrin hərbi vəzifəlilərlə və hərbi nəqliyyat vasitələri ilə komplektləşdirilməsi işinin təşkilində yüksək əzmkarlıqla Azərbaycan Respublikası Səfərbərlik və Hərbi Xidmətə Çağırış üzrə Dövlət Xidmətinin əməkdaşlarına köməklik göstərdiyinə və arxa cəbhədə fəallığı ilə fərqləndiyinə görə layiq görülüb.   

Ötən ilin 8 noyabr tarixində Müzəffər Ali Baş Komandan cənab İlham Əliyevin rəhbərliyi ilə rəşadətli ordumuz Azərbaycanın tarixi, mədəni və strateji əhəmiyyətə malik, təkcə Qarabağın deyil, bütövlükdə ölkəmizin baş tacı olan Şuşanı işğaldan azad etdi. Bu tarixi hadisə və Azərbaycanın hərbi-diplomatik uğurları müharibənin sonrakı gedişatına həlledici təsir göstərdi. Əzəli torpaqlarımızın, o cümlədən müqəddəs və qədim şəhərimizin işğaldan azad edildiyi 8 Noyabr - Zəfər Günü kimi ölkəmizin tarixinə qızıl hərflərlə yazıldı.

Qeyd edək ki, 44 gün ərzində aparılan uğurlu əks-hücum əməliyyatları zamanı AMEA-nın elmi müəssisələri, o cümlədən Nəsirəddin Tusi adına Şamaxı Astrofizika Rəsədxanası dövlət başçımızın müvafiq fərmanına əsasən yaradılmış  Silahlı Qüvvələrin Yardım Fonduna ianələr etdi. Rəsədxana tərəfindən ordumuza həm maddi, həm də mənəvi dəstək nümayiş etdirildi. ŞAR-ın 7 əməkdaşı könüllü cəbhə bölgəsinə yollanaraq düşmənlə üz-üzə mübarizə apardı. Alimlərimiz baş verənləri dünya elmi ictimaiyyətinin diqqətinə çatdırıb, erməni yalanlarının ifşa olunmasında yaxından iştirak etdilər. 

Rəsədxana kollektivi olaraq, Azərbaycan Respublikası Səfərbərlik və Hərbi Xidmətə Çağırış üzrə Dövlət Xidmətinin rəhbərliyi tərəfindən fəxri mükafata layiq görülən dəyərli alimimiz, Şamaxı Astrofizika Rəsədxanasının rəhbəri Namiq Cəlilovu ürəkdən təbrik edirik.

© Bütün hüquqlar qorunur. Xəbərlərdən istifadə edərkən www.shao.az saytına istinad zəruridir.